Aizawl: Zo hnam inpumkhatna leh insuihkhawmna atan Zoram Unity Mall chu Mizoram sorkarin Muanna Veng, Aizawlah sa turin a inbuatsaih a. Central sorkar finance ministry atangin SASCI Part-VI 2023-2024 hnuaiah Rs vbc 127 allocation an nei tawh.
Chief Minister Zoramthanga chuan nimin khan Instagram account-ah Zoram Unity Mall sakna tur hmunhma pawh June 29, 2023 khan a hoin Tourism Minister Robert Romawia Royte leh official dang te, khawtlang hruaitute nen an lo enfiah tawh a. Tunah hian tourism department-in chak taka hma an la mek niin a tar lang.
Chief minister tar lan danin Zoram Unity Mall hi mipui tana tangkai thei ang bera hman tum a ni a. Mall-ah hian hotel nuam leh changkang, food court, conference room, Zo hnam chi peng hrang hrangte pual dawr leh Mizoram district zawng zawng puala dawr te, India ram state leh UT hrang hrangte pual dawrte a awm dawn bakah, sumdawnna dawr dang chi hrang hrang awm a awm thei dawn bawk a. He mall sak tur hi tourism leh mahni kutkawiha eizawngte hmasawnna tur atan leh inpumkhatna atan ruahman niin Zo hnam inpumkhatna leh insuihkhawmna atan pawha tangkai tur a ni.
Hei bakah Mizo thalaite leh naupangte tan pawh intihhlimna hmun nuam tak, khualzinte thlenna leh inhnangfakna hmun tur, hall nuam tak leh event lian buatsaih theihna tura mall hi duan a ni bawk.