Environment Forest & Climate Change Minister TJ Lalnuntluanga’n khawpui boruak tih thatna tur scheme Nagar Van Project – Mizoram district hrang hrang leh autonomous district council pathuma hmun 14 tan lungphum a phum.
Hemi rual hian lehkhabu pathum – The Golden Years of Mizoram Forest, Lungkulh Biodiversity Hotspot leh Photo Documentation of Murlen National Park a tlangzarh nghal a ni.
TJ Lalnuntluanga chuan Green India Mission, Mizoram puma kalpui a nih theihna tura hmalakna te a sawi a, JICA funded project Biodiversity Conservation & Forest Enrichment project atana chak taka hmalak mek a nih thu sawiin, “He project hian ramngaw te bakah tuihna te a siam tharin tuchhuante tan boruak tha leh ramngaw a siam tha dawn a ni,” a ti a. Forest department-a officer leh staff-te chu nasa zawka tan la tur leh ngaihtuahna thar hmang zel turin a fuih a ni.
Minister chuan Forest Conservation Amendment Act chungchangah EF&CC department chuan a ngaihdan leh a duh lohna chhan hrang hrangte hun tiam chhungin ministry-ah a sawi a. Heti chunga Lok Sabha-ah pass a ni tho chu pawi a tih thu a sawi a, he thil hi state legislative assembly chuan duh lo tih lantirin resolution a pass tih a sawi.