Thil thar zir chhuahna hun atan ramri kham chin tak tak a awm lo va, tlai lua tak tak a awm thei ngai lo. Kerala-a pitar kum 98-a upa chanchin han hriat phei hi chuan a dikzia a lang reng mai.
Karthyayani Amma chuan an state sorkarin Kerala State Literacy Mission Authority hnuaia ‘Aksharalaksham’ programme a kalpuiah lehkha zir tha lehin nimina result an tihchhuahah a ti tha ber a ni a, mark 100-ah mark 98 zet a hmu phak.
A zirna kawngah hian chawlh mai a la tum lo zui a, computer lam thiamna zir chhunzawm leh a tum mek a. “Naupangin lehkha an zir hian min tiphur thin a, thalaite zawk ang bawkin thiamna neiha sorkar hnaa thawh ve pawh ka châk a. Tunah hian computer lam zir leh ka duh a ni,” tiin a sawi.
Kerala-a Alappuzha district, Haripad huam chhunga Cheppad khuaa mi hian nimin khan Chief Minister Pinarayi Vijayan hnen atangin Pawl 4 tlukpui zir leh theihna tura an siam, Aksharalaksham certificate chu a dawng a ni.
Amma hian ziak (writing)-ah mark 48-ah mark 38 a hmu tih loh chu Mathematics leh reading-ah chuan full mark, mark 30 ve ve a hmuh thu Mission Director P.S.Sreekala chuan a sawi a. He pitar hi an state chhunga hmeichhiaten zirna kawng an zawh duh phahna tura fuih phurtu, literacy programme an neih meka puitu a nih theih a beisei thu a sawi bawk.
“Tuna kan kalpui mek phase hian kan state-a ward 2000 vel a tuam mek a. A dawt leh phase-ah hian tualchhung rorel khawl nen thawkhovin programme lian zawk kan duan theih kan beisei,” tiin Sreekala chuan a sawi a. “Literacy Mission hian a tum ber chu kum 4 lo awm leh tur chhunga kan state pum ziak leh chhiar thiamtir vek a ni,” tiin a sawi bawk.
Kum 2011 chhiarpuiah khan Kerala-ah hian mi nuai 18.5 vel chu ziak leh chhiar thiam lo an ni a. ‘Aksharalaksham’ an tih hi flagship literacy programme niin LDF kaihhruai sorkar chuan an state pum 100% literacy ni thei tura a beihna hmanrua a ni.
Pitar Amma-i pawhin a beih exam-ah hian mi 43,330-in exam hi an bei a, mi 42,933-in an paltlang a. A pumin mark 100 puin reading, writing leh mathematics skill-ah exam beitute hi an inel a. Pass chhuak tur hian reading-ah mark 9, writing-ah mark 12 leh mathematics-ah mark 9 hmuh a ngai a. A pass chhuakte hi Literacy Mission hnuaiah tho Cl IV tlukpui zirnaah an inziak luh thei dawn a ni.