Inthlanpui kan zo ta. Sorkar na siam turin ZPM in MLA an ngah ta ber a, mipuiin kan lo duh hle tih a hriat ta bawk. Anni kaihhruaina hnuaiah hian kum nga chhung chu kan han awm dawn ta a, duhsakna kara huphurh lawkna rilru nei pawh an awm nual ngei ang.
ZPM thlipui hi a tleh na khawp mai a, an movement hi a kal na vet vet hle. Party tan lam nei lo ‘neutral’ tia sawite thlengin ZPM hian an hui viau tih a lang a, an hmachhawp leh an kalphung thar hi enchhin a chakawm tawh hle bawk.
Mizoramah kum fe a vei hnuah MNF leh Congress ni lo sorkar thar kan han hmu leh tur hrim hrim pawh a lawmawm a, CM thutthlengah midang an han thu ve tawh tur hrim hrim pawh hi a nghahhlelhawm tawh bawk.
ZPM te hian intiamna leh kalphung thar hrang hrang sawi an nei nasa a, an campaign auhlaah pawh an hmang nasa hle. Hei tak hi mipuiin kan duh nachhan ni pawhin a lang. Tunah sorkar na an han siam dawn ta chu a ni a, an intiamna leh kalphung thar an zawrh hmang ngei hian hma han la nghal se la, mipuiin beiseina sang tak nen kan thlir tih hrereng chunga kan ram an kaihhruai hi kan beisei tlat a ni.
Hetih lai hian sorkar na la chelh ngai lo an nih miau avang hian kawng engkimah an fei a ngai viau dawnin a lang a, mipuiin an teh nasa zual dawn a, sorkar beihna hrang hrang pawh a la awm ngei ang, an tuang tihchhah hun leh thusawi hun leh ngaihthlak thiam hun pawh an neih a tul ngei bawk ang. Chutiang tur chuan sorkar thar beiseina nen kan thlir reng bawk e.