Los Angeles Lakers chuan NBA In-Season Tournament a semi-final hmun la awm hnuhnung ber chu chang turin Phoenix Suns 106-103 in an hneh.
Nilaini zinga Los Angeles a Crypto.com Arena a inkhelah hian veteran LeBron James leh Phoenix Suns lamah an star player Kevin Durant te an langsar a. Vawi tam tak an lo tih tawh thin angin an team in hnehna an channa tura hmahruaitu an ni.
Kum 38 mi James-a’n inkhel hun pawimawh laiin basket pawimawh tak a la thei fova, fourth quarter bikah point 15 a score a. Hei hian Durant-a hova second half a tho leh Suns team an hnehna kawngah nghawng a nei thui.
James hian minute 40 court-ah a hman chhungin point 31 a score a, assist 11 neiin ball vawi 5 lai a steal bawk. Anthony Davis chuan point 27 leh rebound 15 la in Austin Reaves chuan point 20 a score bawk.
Suns tan Durant-a’n point 31 tho score in Grayson Allen leh Devin Booker ten point 21 ve ve an score.
Lakers in hnehna an chan avang hian semi-final ah New Orleans Pelicans an tum leh dawn a. Lehlamah Indiana Pacers leh Milwaukee Bucks te an inkhel ve dawn a ni.