Karleh atang hian Senior Women’s Inter Zonal One Day Trophy 2023 – 2024 Tournament chu Baroda-ah khelh a ni dawn a. India rama zone hrang hrang aiawhte inelna turah hian North East Zone team player 15 thlan zingah Mizo player pathum – Lalrinfeli Pautu, Vanlalremtluangi leh Ramengmawii te an tel.
February 9 thleng khelh tur inelna a tel tur Hnahthial nula Lalrinfeli Pautu hi batter niin tun hnaia BCCI hnuai tournament ah tualchhung player zinga che tha pawl ber a ni a, Vanlalremtluangi hi Zemabawk veng niin ani pawh Mizoram team a che tha ber zing a mi keeper-batter anih bakah ‘CAM Junior Cricketer of the Year nominees’ zing ami kha a ni bawk.
Durtlang nula Ramengmawii hi ‘CAM Women Cricketer of the Year’ atana thlan niin tunhnai a Mizoram in Bihar an hnehna a thawhhlawk ber zing ami a ni bawk.
An pathum bakah hian Stand-by player mi pathum zingah Ainawn Veng nula Lalrinmawii a tel a. Rinmawii hi Mizoram pace bowler tha ber tia chhal ngam niin tun hnai BCCI tournament bowler hlauhawm zing ami a ni a. North East team ah Physio atan Abishag Vantluangpuii a tel bawk.