Zpm sawrkarin sawrkar hnathawk aikal lak a rem tih tawh loh tur thu leh an hnaa kal vek tura thupek a han chhuah chu chhungkaw buai fe fe an tam khawp mai. Aikal la hi education department ah an tam filawr hle tih a lang a. Mahni khaw sikul zirtirtu hmel la hmu ngai miah lo te pawh an lo tam khawp mai. Mahni thawhna khua, a hming chauh hria te pawh an lo awm bawk. Kan va lo chhangchhia in a lo va rapthlak em. Mipui pawhin he thu kher hi chu an thlawp hle tih a lang a. Sawi tam ngam vak lo chunga ngawi renga mahni thawhna sikul / khaw lam pan pawh hriat tur an awm nual. Thupek lawmawm anih laiin order duhawm lo nia ngai chu an lo kat nuk e. Engpawh nise, sawrkar thar hmalakna thlawp hlawh tak ani hrim hrim e.
Sawrkar kal tawhte pawh khan he thil hi ngaimawh mahse a taka a nghawng tur avangin an luhchilh tak tak ngam ngai lova. Vote heu tur hi an ui vek a lo ni. Hetia sawrkar tharin thuchhuah a neih a, thlawp a hlawh hle laiin tunlai hian chhuanlam chi hrang hrang avanga loh theih loha aikal la te ngaihhnathiam an ngaih thu a ri leh ṭan ta. Damlohna thil avanga aikal la te, a aiawh chu a thawk taka aia a ṭhat zawk avanga ngaihhnathiam an ṭul thute titi ah a lo ri leh ṭan ta. Sawrkar hi a thupekah a ding tlang ngam dawn em? Mizote hi inhre tawn vek tham lek, inthik tawn thei hlir mai kan ni a. Aikal late hian chhuanlam ṭha tak sawi tur an nei vek dawn a. Pakhatin chhuanlam a siam a, pawm anih chuan a dang pawh khan chhuanlam chu an nei vek turah ngai nghal ila. Chhuanlam nei miah lo aikal la chu an tlem viau ang.
A enga pawh chu lo ni sela, aikal lak hian dan a bawhchhia tih hi pawm phawt mai ila. Sawrkar pawisaa midang lo rawih hi dan bawhchhiatna ani chiang bang a. He thu hi kan sawrkar order siamtute hian chiang hle phawt teh se. Ngaihhnathiamna kan sawi nghal chuan order hmasa hlawhchhamna tur kan belh nghal tih hria ila. Kan khauh anih chuan khauh tlang mai hi mipui lawm hlawh zelna tur tih i hria ang u.