Kuthnathawktute hmangaihtu sawrkar inti ngam ngat sawrkar thar kan nei a. An sawrkarna hnuaiah mipui pawhin beiseina sang tak kan nei a. An sawrkar tuk atangin an programme tur an puang ulh ulh a. Kut kan beng ruih ruih a. Chief minister in thlai thar an lei nghal tur pali a puang a. Chungte chu sawhthing, hmarcha, aieng leh hmunphiah a ni. Kuthnathawktute tan kawl a êng ve dawn ta nia langah hian kuthnathawktu ni velo thlengin kan lawm a ni.
Mahse, hei ni 100 em pawh a la tlin hma in hmunphiah chingtute manganna chuan titi a luah ta. Kan sawrkar in a lei dawn emaw ti a an lo thlir chu Assam lam vai pakhat an lo dawr a lo ni a. Chu vai Kamrup lam mi chu an beisei anga mihausa leh sum leh pai ngah a lo nisi lo ni tur a ni. A rawn lei leh thei silo. Kan sawrkarin hetianga thil a chin khawloh hi remchangah la in kumdanga rawn lei thin Bhaga vai ho lah chuan hmunphiah hralh lo thei lova mizote awm tur an lo thlir kar mai a. A tlawm pawhin an hralh dawn tih an hai lo. Hmunphiah hralh hun hi February thla chhung ang vel a ni a. A aia a tlai chuan hmunphiah hi an lei tawh meuh thin lo a ni. Chutiang tehnuai a kan kuthnathawktute an awm lai chuan tunah hian kan sawrkar tihngaihna hre lo chuan mahni thiam dan dana hmunphiah hralh turin kuthnathawktute a chah leh ta a. Khawvar tura beisei laiin a rawn thim zual sauh ni hialin a lang ta.
Hmunphiah hralh ah hian sawrkar a inrawlh loh pawhin am hralh kumtin a. India ramah hian hmarchhak state te hi hmunphiah thar tam kan ni a. Assam leh Meghalaya hian keini aiin an thar tam fe a. Keini thar ve hi chu chuti tak a ni lem lo. Hmunphiah sumdawnna hi India ramah hian a te lem lova. Kum tluana sumdawnna kal a ni a. A thar hunlaia dahthat dan zawn ve hi kan hmabak chu ani ngei mai. Chutih ruala kan sawrkarin a hmachhawpte nasa taka puanga a han hlawhchham nghal hi chu a tuartute tan a pawi takzet a. Sawrkar hi a inrawlh anih chuan a tawp thlenga buaipui tur ni awm tak kawnglakah a tawp san leh si hi a rilru nat thlak bawk.
Engpawhnise, kumin atan chuan kan sawrkar hi a failed tawh a. Kumdang atan a inpuahchah vat vat a ngaihzia zir nan hmang sela. Chutih rual chuan sawrkarna changtu hian thil zirchiang silova sawi zung zung chin hi sim nghal bawk sela. An tih ngei theih loh tur hi chu huaisen taka puan pawp pawpin a nghawng pawi theihzia hi hre nghal teh se. Tuna mizoram mamawh hruaitu chu a tiha titu, sawi tam lova hlawhtlinna kawnga min kaihruaitu, a tak ram min thlen theitu, harsatna a lo thlen a mipui ruala ke pen tlattu a ni. Kan ram hun kal tawhah sawi chak tak, a tak ram min thlen silo kan hrawn tawh a. Tunah beiseina nen kan sawrkar kan thlir a. An step lak a sual nghal ngawt mai hi a pawizia mahni inhmu sela. Darthlalangah in en in, an thil ruahmanna hlawhchham hi hmu chiang hram teh se. Kumin a chetsualna hi nakumah a thleng leh anih chuan mipui hian an ngaidam hauh lovang tih hre bawk teh se.