British sorkar awp thin ram democratic ram ni zui ta te (commonwealth countries) hian British parliament kalphung an zui deuh zel a. India parliament kalphungah pawh chuan British parliament ziarang thui tak a la awm a ni. India parliament phei chu mi chi hrang hrang, mize in ang lo leh culture hrang hrang awmkhawmna a ni a. Chuvang chuan tunhma atangin kalphung mumal leh tihdan phung fel tak neiin an lo kal tawh a. Rorelna mumal taka a kal theihna turin member tinin an zawm a ngai thin a ni.
Kan assembly pawh hi parliament ang tho hian kalphung mumal tak nei a ni a. India ram rorel inkhawmah hian kan assembly rorel inkhawm hi tawngkam leh chetziaah pawh a mawi pawl leh entawntlak ber pawl a nih a rinawm nghe nghe. Ram roreltute pawhin hei hi an vawng nung tha hle zel a. Tawngkam mawi lo deuh hman pawhin proceeding a chuang tur a nih avangin an nuaibo leh hial thin a ni. Ram rorelna hi a zahawm tur a ni a. Chu zahawmna chu a chhunga kalkhawmte vawn tur a ni. Mobile phone khawih, lo titi, thil thial, sahdah hmuam, mutthluk thleng hian thil mawi lo leh zahawmna tibawrhbang thei a ni a. Tih loh hram an tum thin.
Tun tum kan assembly member te hi mithar an tam hle a. House invawn danah pawh tha tak leh zahawm taka an chet nan inzir an mamawh tlang hle. A bik takin house vawn zahawmnaah hian a hotu speaker hian mawh a phur nasa ber a. Speaker chu an zavaia entawn tura a chet a ngai hle. Tun session ni rei lo te chhung pawh hian kan speaker hian member-te a address danah a fimkhur lo deuh tih a lang leh thin a. Memberte thusawi tura a kohin an official hminga ko lova, khawlai thiantha inkoh anga hming lam maite a ching a.Speaker ang bawkin member te pawh an ni tho mai. Hei hi house vawn nan tih loh a tha hle. Tin, memberte pawhin thu an sawiin speaker an address tur a ni. Anmahni leh anmahni an inchhang mai mai tur ani lo. Tuna kan assembly speaker leh member te hian house zahawmna vawnghin turin tan han la deuh deuh teh se.
Kalphung mumal tak awm sa zui mai tur a awm nual a. Thahnemngaih thilah han chip zui lawk ila. Bill put luh dan te, document/report/paper pharh (lay) dan phung te, sawiho hnu a opposition leader koh thin te, a tawp bera house leader-in a khaikhawm (windup) thin te. Heng bakah hian member-te rawn ngai te pawh a awm thin. Entirnan, zawh belhna zawt tur zat te, bill leh resolution sawiho a hun hman tur zat ang chi te hi speaker-in House a rawn thin a, chumi ang chuan a kalpui thin. Zawh belhna (supplementary question) zawt tur zat mi pahnih ni se tih a nih laia speaker berin a phalrai leh tak avangin minister tan pawh a chhan vek harsa khawp an zawt ta luai luai mai a nih kha. Thusawi hun tura tuk zat te pawh hi an bawh pelh thui mah mah a nih chuan session a zahawm lo anga, speaker pawhin dem a kai phah ang tih pawh a hlauhawm awm e.
Minister zawhna (Starred Question) an zawh belhna a zawhna bak vei zawng sawi kual chiam te pawh an awm kha a zia lo deuh. Governor speech sawihonaah pawh zawhna leh chhanna hun ang mai a mahni bial thil sawi leh rawt te pawh an awm a. Kum 1995 (?) chho vel atangin assembly session hi mipuiin TV hmanga kan lo thlir tawh a. Term tin a legislator te (performance) hi mipuiin an thlir zel avangin kalphung pangngai ang lo a thiltih a nih zauh pawhin a langsar viau zel a. Speaker mai bakah house leader leh minister te an fimkhur zual a ngai a. Speaker address kher ngai leh a phalna lak phawt ngai chi te, member puite address dan tur te, etc., te hi ngaihpawimawh lehzual a tha awm e.