- Mahmuaka Chhakchhuak
Mizoramin State kan nihna lawmna champha, February 20, 2024-niah chuan Lammualah State day of Prayer (Ninevi Challenge) hun hman a ni a, Lammualah chauh niloin District dangahte pawh urhsun taka he hun hi hman a niin a hmanna hmun pui ber Lammualah chuan kan ram hruaitu rualte nena hmangin Chief Minister hoa hun hman a ni.
Hun kalta, September 1, 2020-niah khan Mizorama rorelna hmun sang ber Assembly House chhungah kan ram hruaitute chuan tawngtai rualna hun an lo hmang tawh a. He tawngtaina hun hi Rev. C. Lalremsanga, UPC Mizoram General Superintendent kaihhruainaa hman a ni nghe nghein a ni chuan Roreltute chu Pathian ruat an nih thute, rorelnaa thlei bik an neih a thiang lo a ni tihte leh rorelna chu Pathian ta a nih thute a sawi a. He tawngtai rualna hi Session tan hmaa neih a niin hetianga Assembly House meuha tawngtaina neih hi a vawikhatna a ni hial awm e.
Kumina tawngtaina neih erawh Aizawla hmun laili leh remchang tak Lammualah ram hruaitute chauh ni loin mipui tam tak nena hun hman a ni a, hun hmasaah Rev. Dr. K. Thanzauva chu kaihhruaitu niin Pu Lalduhoma, Chief Minister chu thusawitu a ni. Chhawng thuma hun hman a niin a ruala tum thum tawngtaina neih a ni a, saiip puan sin chunga tawngtaina neih a niin hun hmangtu pawh an thahnem hle bawk. Kan CM thusawi hi Lammualah chauh niloin Pulpit tlang atang pawha sawi chakawm tak a ni a, Ram chu Lalpa ta a nih dante, ramin a bawhchhiat chuan hremna a tawn dante leh ram mipuite tih tur thil pawimawh tak takte chu fiah takin a sawi a. A thusawi hma hian Pathianthu erawh a chhiar lem lo ni awm tak a ni a, thinlung hmunkhat pua Lalpa tana maicham buatsaih a nih dan sawiin kum 1927 atanga kumtin March 1 nia khawvel huapa ram puma tawngtaina neih a lo nih thin tawh dante a sawi hmasain ram hrang hrang 127 te’n an lo hman dan sawiin keini pawhin a vawi khatna atan State Day-ah kan lo hmang ve tain kan rama kawng tinrenga Pathian ram alo thlen theihna atan urhsun taka hman a tul zia a sawi.
Pathianin Eden huanah Pathian lalram a din a, chu a lalramah chuan Adama leh Evi-te a dah a, nimahsela anni chuan an lo bawhchhe tain hnawhchhuah an ni a. Chutiang bawk chuan Lal Isua pawhin khawvelah Pathian lalram a rawn din dan tur a sawi lehin ‘I duhzawng vana an tih angin leia mite’n ti ve rawh se’ tih chu Pathian lalram dinna atana thil pawimawh tak a nih dan min hrilh a. He leiah hian Pathian ram kan din hmasak loh chuan chatuan ramah kan lut thei ngai lo ang tih sawiin Pathian rama chengte chu Hriin a tibuai lo ang a, an damrei bawk ang. Tin, Pathian rama chengte chu mi rethei reng reng an awm lo ang a, hnam tam tak an puk tir ang a, anni chuan an puk ve lo ang. An ram chhunga cheng nungcha leh thisiam tinrengte an dam ang tihte sawiin a ram leh felna zawng hmasa tur kan ni a, chumi hnuah malsawmna dang chu a tul ang zelin min pe dawn zawk a ni tiin thiam takin a sawi a. Heng point pawimawh tak tak a sawi lai hian kan ram dinhmunte pawh sawi pah zel bawkin kan rama Pathian lalram ala thlen loh zia fiah taka a sawi chuan thinlung a hneh hle mai.
Heng thu a sawi zawh hnuah hian Pathian hnena tawngtaina neihna atan Pathianthu paruk: Jeremia 18;7 – 8, 26;13, II Chro 7;14, Joba 3;10, Hosea 6; 1, Joel 2;12 – 13 thute chhiarin ‘Lalpa’n kan ram tidam leh sela, kan ram leh a chhunga thil awm zawng zawngte ti dam leh rawh se’ tiin Pathian hnena tawngtaina nei tur mipuite hnenah thu a sawi a, chumi hnuah tawngtai rualna neih a niin amah ngei pawh chu bawkkhupin a tawngtai a, urhsun takin a tawngtai tih pawh kan hmu theuh awm e. Kan Chief Minister ang bawk hian kan Speaker leh Health Minister leh midangte pawh urhsun taka an tawngtai lai han hmuh chuan hnuk a ulh thei dawn hial mai.
Tawngtaina hi he Leia thiltihtheihna sang ber (Prayer is the greatest power on Earth) tih angin kan ram hruaitute nena mipui thahnem takin Lammuala tawngtaina an neih hian thinlung a khawih takmeuh a. Joba anga saiip puan sin chunga tawngtaina hian rah tha a chhuah ngei pawh a rinawm. Kan ramah hian kum 1972 atangin mahnia rorelna kan neiin Union Territory-ah khan MLA pawh 30 kan nei nghal bawk a. Nimahsela UT kan nih atanga vawiin thleng hian kan ram hruaituteah mipui thinlung a dam tak tak thei lo a, ram hruaitute ram hruai danah phunnawina tur kan nei reng thin a ni. Chutianga beiseina sang tak pawh nei ngam tawh lo chunga kan kal laiin kum 2023 kum tawp lam atang chuan sorkar thar kan neiin chu sorkar chu Party mal sorkar pawh tiloin ‘Mipui Sorkar’ tih a ni nghe nghe. Sorkarna fawng an chelh atanga thla hnihna emaw lekah State Day hman a niin anni chuan (a bik takin kan Power & Electric Minister Pu F. Rodingliana bultan a ni ber zawk awm e) anmahni chauh pawh nilo mipui, a thei apiangte telve theihna turin Lammualah tawngtaina hun khatiang khan an buatsaih ta a.
Tawngtaina hi thil ropui tak a ni a, a bik takin tawngtaina ngai pawimawh mi ram hruaitute hi an rawngbawlna a tluang bik em ni tih tur a ni a. US President Eisenhower ngei pawh kha’n a tlangval laiin a chetsual avanga a ke tan ngai khawp tawh chu tawngtaina avangin a dam that leh a beisei tlat avangin a chhungte chu tihtakzeta tawngtaina nei turin alo ngen tawhin damna a lo chang tawh a, Nelson Mandela ngei pawh kha Pathian hnenah tawngtaiin alo kun fo tawh a, Abraham Lincoln ngei pawhin Pathianah rinna thuk tak neiin darkar tam tak tawngtainain hun alo hmang fo tawh thin. Mahatma Gandhi ngei pawh chuan tharum telloa zalenna a beihnaah khan tawngtaina chu a rinchhan pawimawh berah alo nei tawh a, Queen Elizabeth ngei pawhin tawngtai pawimawh zia hriain Biakinah tawngtaiin hun a hmang fo thin bawk. American Civil Rights Movement hruaitu langsar ber Martin Luther King Jr. ngei pawh kha dodalna karah pawh tawngtai fan fan mi a niin George Washington phei kha chuan Bible telloin engtinnge ram a kal thei ang a ti hial a nih kha. Hetiang hian ram hruaitu tan tawngtai hi a pawimawh em em a ni.
Ram hruaituteah beisei kan nei sang thin a, a dik e. Kan beisei ang ngeia ram an hruai theihna atan kan tawngtai sak fo tur a ni a, kan tawngtai sak mai bakah anmahni ngei pawh Pathian hnenah an tawngtai fo bawk tur a ni. Tawngtaina hi Pathian biakna a ni satliah lo a, Pathian hnena intukluhna leh inhlanna pawimawh ber a nih tlat avangin tupawh mai hian Pathian telloin nikhat pawh kan nun theih loh zia kan hriat a, tawngtaina kan neih fo a pawimawh a ni. Kan ram hruaitute hi mi famkim chu an ni bik hauh lo ang a, nang leh kei hian kan tawngtaipui fo a pawimawh a, an tan Pathian kan auh fo a tul bawk a ni. Tichuan kan ramah hian Pathian lalram alo thleng thei ang.