French Open 2024 khelh mekah mipa lama champion tura rinkaite an chak zel. Ningani khan Daniil Medvedev chuan awlsam taka chakin third round a lut a. Nilai zanah Carlos Alcaraz leh Jannik Sinner ten hnehna changin second round an lut ve thung.
Russian 5th seed Medvedev hian ningani khan second round-ah Serbia mi Miomir Kecmanovic a hmachhawn a, set thum khelh ngai lovin hnehna a chang. Medvedev hian 6-1 in set khatna a la a. Set hnihnaah 5-0 in hma a hruai leh mek bawk. Awlsam taka set la nawn leh tura ngaih a nih laiin a khingpui Kecmanovic hian hliam a tuar a, inkhel chhunzawm zel lovin chawlh a thlang a. Khelh hah zui ngai lovin Medvedev hian hnehna a chang a, thir round a lut ta a ni.
Thawhlehni khan champion tura rinkai zinga mi Carlos Alcaraz chuan set khat hloh chungin Jesper de Jong a hneh a, second round a lut. Alcaraz hian ranking-ah amah aia No. 173 zeta hniam De Jong lakah hian harsa lutuk lovin st a la zawn a. Set hnih a lak zawn hnuin set thumnaah game hnih bak a la thei lo va, set a hloh. Set a hloh hnuin tha zawkin a kir leh a, awlsam taka set la zui lehin De Jong lakah hian 6-3 6-4 2-6 6-2 in a chak zui ta a ni. Alcaraz rual hian Jannik Sinner pawhin second round a lut ve bawk.