Kolasib District Police chuan nimin khan an district chhunga Village Defence Party (VDP) hnathawk tha 5 te hnenah thilpek an hlan a, VDP te hmalakna hian cheng nuai 2 chuang man hu ruihhlo tih chhiat a ni.
Hemi puala inkhawm hi Addl. SP C. Lalsawta’n a kaihruai a, SP David Lalthangliana’n VDP hnathawk tha 5 – Saipum VDP Unit, Thingdawl, Hortoki, Bukpui leh Kawnpui VC I VDP Unit hruaitute hnenah thil pek a hlan a. Thu sawi chhunzawmin Police te leh VDP te tha taka an thawhho hian khawtlang nun nuam zawk a siam leh ram damna kawngah chak takin hma an la thei tihte, Kolasib District chhungah VDP tha tak an ding a, hma chak taka an lo la thin chu lawmawm a tih thu a sawi a, an hmalakna hrang hrangte pawh chhuanawm a tih thu leh, hma an lak chhunzawm zel a duh thu a sawi a, an hmalakna te Police ah report zel thei se a duh thu a sawi.
Kolasib SP chuan, VDP te chu dan hnuaia ding thlap, sorkar in a hriatpui an nih thute, chumi avang chuan hma an lakna ah inthlahrung lo turin a chah a, hetihrual hian an hmalakna danah erawh an fimkhur a ngaih thu leh an hmel tibal thei zawnga hmalak a that loh thu a sawi.
He huna an tarlan danin, Kolasib District chhungah hian VDP dinna khua leh veng 29 a awm a, VDP hmalakna hian Zu bilhlai litre 1370 tihchhiat niin Rakzu litre 467 an mana , Sapzu um 60, Yeast 20, Heroin gram 125 , Ganja gram 100 manin an thil man hlut zawng hi Rs 2,98,400 man hu a ni.