Euro 2024-ah Spain an champion hma khan Spain champion puitu Luis de le Fuente hi mi tam takin an hre lova, an ngaihven hek lo. Phu taka Spain a champion pui hnuah erawh football khawvela manager hming langsar a ni nghal a, a chanchinin ngaihven a hlawh. A thluak that em vanga ‘Professor’ an tih mai Luis de la Fuente kan belchiang a
- Hmanah chuan
Ram buai hma kum nga, kum 1961 khan Bilboa South khaw pakhatah mipa naupang a piang a, a hming chu Luis de la Fuente Castillo a ni. La Fuente hian Spain naupang dang ang bawkin football a tuichilh nghal a, kum 15 mi a nih laiin Athletic Bilboa youth team a zawm. Kum 1981 atangin Athletic Bilboa senior team tan a khel tan a, Sevilla leh Alaves tan a khel tawh bawk. A position hi left back niin, club tan vawi 348 a khel a, goal 12 a thun.
Spain hi football a ram ropui an ni a, mipa naupang tawh phawt chuan footballer hlawhtling nih an tum hmasa zet thin. Player tha tak tak an tam em vangin club leh ram tan hlawh tling tura an inel nasat em vangin hmun chan a har em em a, Luis de la Fuente ngei pawh hian par a chhuang zo meuh lo. Spain youth team; Under 18 leh 21 tan khel in, Olympic 1988 ah ram aiawh bawk mah se Spain senior team tan a khel ta miah lo thung a. Kum 1994 khan player angin football a chawlhsan.
- Team enkawl lamah
Football a chawlhsan hnuin Luis de la Fuente hian coaching a luhchilh zui nghal a, a club enkawl hmasak ber hi ram bial khata league club (Mizoram Premier League ang hi ram bial khat (regional league) chu a ni) Portugalete a ni a. Portugalete a chhuahsan hnuin Aurrerá a enawl zui ve leh. Kum 2001 khan Sevilla youth team a enkawl tan. Sevilla youth team a enkawl lai hian a la naupan vanga senior team a la tel phak lo Sergio Ramos chu senior team-ah a hlangkai a. Romos hi khawvela defender tha ber zingah a tel zui ta hial a. Spain tana khel hnem ber a ni ta hial bawk.
Seville youth team a enkawl hnu hian Athletic Bilbao (youth), Bilbao Athletic, Bilbao Athletic leh Alavés te a enkawl zui leh. Kum 2013 atang khan Spain U19 team a enkawl tan a. Kaisan chho zelin Spain U21 leh Spain U23 team a enkawl zui leh a. Kum 2022 khan Luis Enrique hmunruak luahin Spain national team a enkawl tan ta a ni.
- Hlawhtlinna lam tluang
Luis de la Fuente hi thawkrim leh inzir peih tak mai a ni a, an khingpui turte reng reng a zir chiang hmasa fe zel a. An khingpuite chakna lai leh chak lohna lai, an panna lai leh an tlakchham a hrechiang hman fe zel. An khingpui turte mila insiam rem thiam tak a ni. A thawkrim a, a zir peih em vangin a team enkawl tawhte hi tutan mah hneh an awl ngai lo. A thawhrim leh a inzir peih piahah team boruak tha duh mi a ni a. A player te, an player chhungte leh a coaching staff te a ngaihven em em a, a be seuh seuh a, inpawhna thuk tak an nei vek thin. Team boruak tha tak a siam a, inhawng leh nuamti takin an khel chhuak thin. Hei hi De la Fuente danglam bikna a ni.
A thawhrim leh a inzir peih rah hi Spain in an seng a, De la Fuente hnuaiah hlawhtlinna hrang hrang an chang. Spain team a enkawl tawh zawng zawng U-19, U-21 leh senior team te Euro-ah a champion pui vek a. Spain senior team hi UEFA Nations League-ah a champion pui bawk. Hei bakah hian Olympic 2020 khan Spian Under 23 team chu final a thlenpui a, final-ah vanduaiin Silver medal a dawnpui bawk. Luis de la Fuen te ni manager dang reng reng a, Spain Under 19, U – 21 leh Senior team major tournament-a champion pui vek thei tumah an la awm lo.
- Ngainat hlawh Fuente
Luis de la Fuente hi age level atanga Spain team enkawl a, kaisang chho hret hret a nih vangin a player te a hrechiang hlawm hle. Spain player tam tak hi hlawhtlinna a lo chanpui tawh an nih vangin a ngaina a. Hlawhtlinna chanpui tawhtu a nih vangin Spain player tam takin an ngaina a ni mai lova, an zah em em bawk. Euro 2024 a Spain team ngei pawh kha chhungkua ang mai an ni. Chu chu hlawhtlinna chang tura thil pawimawh tak a ni.
Olympic 2020 final-ah Brazil hneh lova Silver medal an lak tum khan Mikel Oyarzabal, Unai Simon, Pedri, Marc Cucurella leh Mikel Merino ten bul an tan a, anni pangate hi Euro 2024 a Spain player pawimawh tak takte kha an ni. Under-19 European Championship – 2015 a an champion tum khan Rodri, Mikel Merino leh Marco Asensio te hi a player pawimawhte an ni a. Under-21 Euros – 2019-ah an champion tum khan Dani Olmo, Mikel Oyarzabal leh Unai Simon te a chhawr rim leh viau bawk. Age level-a a kaihruai tawh player hrang hrangte hi an birth certificate en kher lo pawha an kum zat a hriat chian em emte an ni.
De la Fuente hi rawlthar player tha duhsak thiam tak a ni a, a hnuaiah ngei Lamine Yamal leh Nico Williams an rawn vul thar ta chiah bawk. Kum naupang zawkte chunga rinna nghat thiam tak a ni a, chutihlaiin senior player te a dah pawimawhin a zahthiam viau bawk. Euro 2024-ah ngei pawh khan Spain team hi senior player leh junior player te an inchawih mawi hle a. Pangpar huangah pangpar upa tawh lam leh pangngai kung tharte inchawihmawi taka an par chiai ang deuh hi an ni.
Argentina manager ropui ber tia sawi phu Lionel Scaloni hi Luis de la Fuente nen inpawhna thuk tak nei an ni. Scaloni-a’n coaching degree a neih theih nan De la Fuente hian a pui a, kawng a sahkuaksak viau niin sawi a ni. World Cup, Copa America leh Finalissima a Argentina champion pui tawhtu Scaloni hian Euro-a Spain an champion hnu khan Luis de la Fuente lawmpuina thu a chhakchhuak thuai a. “Coaching course ka zir lai khan Professor Luis de la Fuente hi ka zirtirtu a ni,” tiin Athletic a hrilh.
- Mah se… Mah se
Football a ram ropui ber ber, Italy, Germany, France leh England te hneh vekin Euro 2024-ah Spain a champion pui te te a, fak leh chawimawi a hlawh em em laiin Luis de la Fuente hian USA manager hna ruak mek a ngaihven niin tarlan a ni teh tlat thung.
The Washington Post in an tarlan danin Luis de la Fuente aiawhte hian zirtawpni khan USA head coach hna ruak mek dilna chu email kal tlangin an thawn a. U.S. Soccer Federation lam atangin chhanna mumal an la dawng lo thung. De la Fuente hian Spain hi World Cup 2026 thleng enkawl turin contract a la nei. Heti chung hian Euro-ah a champion pui hnuin a hna bansan a hreh lova, World Cup thleng tur USA team enkawl chakna lian tak a nei. World Cup-ah meuh pawh champion theihna hun tha nei Spain aia USA a thlang a nih chuan Luis de le Fuente danglamzia tilangtu a ni ang.