Nimin khan ZPM Party Hqrs Hall Republic Vengthlangah ZPM Ṭhalai Hqrs ECM chin chuan Political training an nei.
Chawhma hunah Jeje Lalpekhlua MLA leh President ZPM Ṭhalai Hqrs ni bawk chuan kaihhruaiin Zoramchhana Sailo, Vice President ZPM Ṭhalai chuan hunserh a hmang a. B.Lalchhanzova, Minister F&CS leh TBC.Lalvenchhunga, Adviser to CM (Finance) te’n thusawina hun an hmang.
B.Lalchhanzova Minister F&CS leh TBC.Lalvenchhunga Adviser to CM (Finance), Lalnghinglova Hmar (MOS) S&YS, Lalmuanpuia Punte Adviser to CM – te chuan ZPM Thalai kalkhawmte hmaah Party Administration, Political Administration leh Media & Publicity, Nationalism, Motivational & Youth Development chungchangte inzirtirna leh inhrilhhriatna hunte an nei a, fuihna thu an sawi bawk.
He hunah hian Minister B.Lalchhanzova chuan “Kan han sorkar a, sorkar hmasate kihhnawk kan thianfai mek a, kan thenfaina kawngah hian Opposition party pahnihten min beihrawn mek a ni. Mahse thil țha kan tihna kawngah hian kan Chief Minister Lalduhoma’n min fuihna țhin angin huaisen takin kan kal zel dawn a ni” a ti a. Tin, B.Lalchhanzova chuan “Tun kan buhfai Supplier thlan dan chungchangah pawh hian minister tumah kan inrawlh lo tih hi Opposition-te ka hrilh duh a ni” a ti bawk.
He huna thusawitu dang TBC Lalvenchhunga Adviser to CM (Finance) chuan, “ZPM chuan kan tum bulpui ber chu mipuite tana kan Policy zawrh tihhlawhtlin hi a ni a, chumi hawi zawng chuan ZPM hi a kal mek zel a, Țhalaite paw’n kan policy tihhlawhtlin nan kan tum-ah kan chiang a, Sorkar kan țanpui a ngai em em a ni. Tun hun hi țhalaite khawvel a ni a, tunah hian țhalaite khawvel ti-êng turin Hand Holding Policy hman kan tum a ni. ZPM Thalai te hi kan Sorkar Policy tihhlawhtlinna atan hian kan chakna hnar in ni” a ti bawk.