- Mahmuaka Chhakchhuak
Mizoram Chapter INTACH hian kawng hrang hrangin hna an lo thawk tawhin vawiin thleng pawhin zofate tan hna an la thawk mek zel bawk a. Tunhnaia an hnathawh langsar tak pakhat chu Londan atanga lehkhabu hlu leh roh em em tur pali lai mai an haichhuah leh midang tana tangkai zawka hman a nih theihna tura kan zirna In leh hmun pawimawh tak taka hlanna an neih chanchin hi a tlangpui han sawi ila. He lehkhabu hlanna hun hi July 11, 2024 nia khan niin Art & Culture Minister, Pu C. Lalsawivunga Office Chamber-ah hun hman a ni.
Heng lekhabute hi haichhuak turin mi nazawng tan tihtheih rual a ni lo a, Mizoram Chapter INTACH Treasurer Dr. Lalbiakmawia fanute pahnih; Lalbiaknungi Ngente leh Lalbiaktluangi Ngente te chu London lama an lo awm remchan hlauh avangin lo tlawmngai tura ngen an ni a. Amaherawhchu chuti mai chuan anni tan tihrual a nih loh avangin Dr. Remsangpuia, tuna Delhi-a Asian Baptist Alliance hnuaia thawk mek chu biakpawh a niin, ani hian Pu Buanga sulhnu chu Angus Library & Archive, Regent Park College, Oxford University, United Kingdom-ah a awm thu leh a tul anga a thawktute hnenah pawh ‘Introduction’ a siam theih thu alo sawi a. A ni ruahmanna ang chuan Pu BMA fanute pahnih chuan Oxford University lam chu panin Oct. 26, 2023 khan an kal a, thahnemngai taka an zawn hnuin beisei angin Pu Buanga Dictionary-a kimlo lai tak chu an hmu lo nain Pu Buanga sulhnu thil tam tak leh keini lam tana thil hlu tak tak tur erawh an va hmu thung a.
Chung an thil hmuhchhuahte chu hengte hi an ni;
Pu Buanga Lehkhathawn leh a lehkhathawn dawn thenkhatte
Pu Buanga kut hnu thenkhat, Dictionary chungchang leh thil dangte
Whilom Head Hunter
Darphawka Mumang – Ziaktu; C. Chama, Theiriat
A bu chhung thu tlangpuite; Pu Buanga lehkhathawn leh a lehkhathawn dawn thenkhatte; He lehkhabuah hian Pu Buanga rawngbawlna report hrang hrangte, Bible lehlin chungchang leh Bible chhungthu thenkhat chhuah tawh dante, Bible lehlinnaa Rev. Thankunga (Pu Buchhawna pa) in a puih nasat dante, Lungleia Bible Translation room plan & Estimate chipchiar taka ziaknate a chuang. He Bible translation room hi 18’x12’ niin Rs. 500 man a ni a. Heng bakah hian thil pawimawh tak tak leh kum 1896-a Lushai Hills a Biak In hmasa ber tuna Macdonald Hill, Aizawla sak a nih thute a chuang bawk.
Pu Buanga kuthnu thenkhat, Dictionary chungchang leh thil dangte; He lehkhabuah hian Pu Buanga dairy – rawngbawl tura an lo kal dan, Rangamati-a thosi leh fanghmir te’n an tihbuai nasat ziate leh an chaw chhumtu (Cook) in a bum dan chenin hmuh tur a awm a. Heng bakah hian Mizo lalte a tlawh thu leh Mizo khawtlang nun thenkhat leh khatih laia Mizo tawnga lehkhabu chhuah – 70, a bu hming leh a phek zat leh a mante chipchiar takin a chuang bawk.
Whilom Head Hunter; Kum 1871-a Sailam lal, Bengkhuaia hoa Mizo pasalthate’n Cachar thingpui huan run tura ral an rel dan, an kalkawng, an zu run dan leh Mary Winchester an man dante leh Mizote’n Mary Winchester Zoluti an lo enkawl dante leh Kumpinu sorkarin an rawn chhanchhuah dante tarlan a ni. Mary Winchester man hi kan rama chanchintha eng lo luhna tura Pathian hmanraw pawimawh a nih dante fiah taka hriat theih turin a awm a, heng bakah hian hemi lehkhabu chungchang hi Pu Buanga chuan hetiang hian a comment bawk; In the darkest spot of earth, some love is found.
Darphawka Mumang; Hei hi kum 1924-a Pu C. Chama, Theiriat ziah a ni a. Darphawka hi Saipuia khua, Valchengah kum 1840 khan alo piang a. A pianpui hming tak chu Darneihthanga niin midang ang lo takin ha hmai to sain a piang a, chuvang tak chuan Ha-thanga tiin a ko thin bawk. Amah hi a phawk (fiamthu duh) theih em avangin Darphawka an ti hlen ta a, Mumang – Vision hi vawi li 1882, 1885, 1890 leh 1895-ahte a nei. Van/ khawvel dangah hruaiin a awm thin a, amaherawhchu mak tak maiin mang a neih apiang hian na takin a damlo ziah a, a tum thumnaah hian a thianpa Hangpawla a hruaiin a mangah hian hri a hmu a, hripui a leng zui a, mi tam tak an lo thi a, chutiang chuan thil mak leh pawimawh tak tak a hmu thin. A mumang (Inlarna) a thil pawimawh pakhat a hmuh chu Tuifinriat ral atanga lokalte’n chanchin tha an rawn hril ang tiin alo sawi lawk a. Hemi avang hian Pathian zawlnei tih hial a ni. Kum 1895-ah khan mang a nei leh a, Vanah ka kal leh a, mahse ka lo haw thlak ka hre lo a, nidang kha chuan ka hre zel a, tunah zawng ka thi dawn a ni ang’ a tiin a sawi a, a sawi hnu lawkah hian a mang sawi hman loin a boral ta a ni.
Heng lehkhabute hi Mizoram State Archive, Tribal Research Institute, Mizo Language Development Board, Mizoram Legislative Assembly, Mizoram University Library, Synod Archive, Baptist Church of Mizoram leh Aizawl Theological College te hlan a ni a. Heng bak hi midang hnena hlan ala ni rih loin hengte atang hian chhiar duh leh ngaihven duh tan pawh ngaihven ni rih mai se a tha mai thei e. Mimalte pawhin heng lehkhabute hi an ngaihven hlawm viau nain tunah rih chuan a copy siam belh ala ni rih lo a, Mizoram Chapter INTACH te hian hralh theih turin an la buatsaih thuai turah ngai ila.
Hetianga kan hnam tana thil hlu leh pawimawh tak mai chhiar theih tura a han awm ta hi lawm lo kan awm kher pawhin a rinawm loh a, zirbing duh tan emaw ziakmite tan emaw mitin tan pawh heng lehkhabute hi chhiar manhla tak tur a nih ngei pawh a rinawm. INTACH hmalaknaa Pu Buanga Dictionary-a dah kim loh zawnchhuah hna erawh beisei angin thil a kal chak thei lo a, BCM hruaitu mi pawimawh tak tak te’n kum 2018-a London an kal a, Pu Buanga In ngei pawh an zuk kal khan a In neitu Barrick Rees chuan thil pawimawhte chu hai a remti tlat lo mai a, ‘ka dam chhungin tuma khawih ka remti lo’ a tih tlat si avangin chumi hmunah chuan a awm em, awm lo em tih chiang taka hriat theih a ni si lo a, kan beidawng rih a ni. Amaherawhchu remchang ala awm ngei turah ngai ila, Pu Buanga Dictionary-a dah kim lohte chauh pawh ni loin Sap Upa ziak; From Head Hunting to Hallelujah tih leh Mission History tih bute pawh kan la haichhuah ngei ring ang u.