Aizawl: Nimin khan ZPM party chuan an office-ah AMC Ward VI by election lo awm tur atan official candidate puanna hun hman an hmang a, AMC Ward VI hian Chanmari West, Edenthar leh Hunthar Vengte a huam a ni.
AMC By-Election Candidate puan inkhawmah hian party mi thahnem tak telin, ZPM Vice President W.Chhuanawma chuan AMC Corporator atana Candidate thlan danah ZPM Party hruaitute chuan ngaihtuahna nasa tak leh fimkhur taka ram leh khawtlang tana thahnem ngai taka thawk tur an ngaihtuah hnuah lungawi takin H. Lalremtluanga, Chanmari West an ruat thu a puang a, Ward VI huam chhunga mipuite pawhin duhsak taka khawngaihna vote lo pe leh theuh turin a sawm a ni.
H.Lalremtluanga hi H.Biakchhunga leh Lalchungnungi te fapa niin Chanmari West ah an cheng mek a, Zirna lamah BA English a zawh hnuin MSACS hnuaiah Outreach worker hnate, tin SIPMIU ah Assistant Programme Director hnate leh New Horizon School ah Vice Principal hnate a lo chelh tawh a ni. Rawngbawlna lamah pawh Presbyterian Kohhran Chanmari Bial Zaipawl member a lo ni tawh thina, Chanmari West Hmar Veng Branch KTP OB hna kum sawm chhung a chelh tawha, tin Bial KTP leader hnate a lo chelh tawh bawk a ni. Kum 2021 khan Tual Upa atana thlan tlin a ni a, kum 2024 ah Kohhran Upa atana thlan tlin niin he rawngbawlna hi a chelh mek a ni.
H. Lalremtluanga, AMC Ward VI ZPM official candidate chuan thusawiin,“ZPM party in duhsak tak mai a candidate tura min thlang hi ka lawm hle a, tawn hriat la nei lo ka nih avang leh he dinhmun hi dinhmun sang tak a nih avangin thutlukna pawh siam a har hle mai a, he khawvel leh a chhunga awm zawng zawng hi Pathian ta a ni a, chumi enkawl hna chu ringtuten Pathian duh dana enkawl hi ringtute mawhphurhna a ni. ZPM party thupui “I ram lo thleng rawh se” tih hian ka rilru a hneh hle a, mahni insit tak chung leh Pathian kohna a nih ringin he kohna zahawm tak hi ka pawm ta a ni,”a ti. “Keima finna leh chakna chuan engmah ka ni dawn lo va, chuvangin in finnate, remhriatnate ka la mamawh dawn chauh a, theihtawpa min fiuh tur in ka ngen duh che u a, Pathian zara hlawhtlinna kan lo chang a nih chuan kan Ward chhungah hmasawnna hna a tam thei ang ber dik tak leh thianghlim taka thawk turin ka inpe a ni,” a ti.
He hunah hian, Lalliansawta ZPM President pawhin Candidate Pathian hnena hlanna hun a hman bakah thusawiin, “Pathianin hei leh chen kan Party min hruai hi lawmawm ka ti a, tun tum AMC Ward VI by election atana Candidate tha tak H.Lalremruata min pe leh pawh hi kan lawm hle a, Ward VI mipuite pawhin duhsak taka in lo thlantlin ngei kan beisei tlat a ni,” a ti.
K. Sapdanga Home Minister pawhin thu sawiin,”Ward VI Corporator-in vanduaithlak tak mai a min boralsan tak avangin by election neih a lo ngai ta a, ZPM-a kan hruaituten candidate tha tak mai an rawn hmu thei hi a lawmawm hle a ni. ZPM ten tun dinhmun kan thleng thei hi kan party chakna chauh a ni lova, Candidate-te tlin vang pawh a ni lova, mipuite rilruah Pathianin hna a thawh vang zawk a ni,” a ti. “MLA inthlanah khan Ward VI chhungah hian hma kan hruai tawh a, MP inthlanah hma kan sawn zela, tun tum inthlan lo awm leh turah pawh hian Pathian leh mipui zarah beiseina sang tak kan nei a ni, kan hmaa inthlan lo awm turah pawh thahnem ngai taka campaign turin party workerte kan sawma, Ward VI mipuite pawhin kan Candidate H.Lalremtluanga hi khawngaih taka min lo vote tlin sak leh turin ka ngen che u a ni,” tiin sawmna a siam bawk.
He hun hi Er. C. Lianlunga, Vice Chairman, Campaign Committee-in a kaihruai a, SL Ngursailova Sailo, Secretary, Campaign Committee-in report a pe bawk.