ZPM Thalai chuan nimin khan thuchhuah siamin, Mualkhang Bottling Plant din thar lehna tur atana Sanction order chu July ni 22, 2024 khan Indian Oil Corporation Ltd. (IOCL) Dy. General Manager Z. Lumding chuan Supply Minister B.Lalchhanzova hnenah a hlan a. Mualkhang Bottling plan hi kum 2006 atanga bul lo tan tawh niin, Oil Industry Safety Directorate Guideline tehna atanga a tlin tawk lohna te hmuh a nih avangin kum 2020 January thla atang khan tihtawp a ni, an ti.
An thuchhuaha an tarlan danin, Mizoram Sawrkar leh IOCL-te tangkawp in a hma aia lian zawka thar thawh tura hma an lakna kal zelah Mualkhang Bottling Plant hlui chu thiah a, OISD 144 design mila a thar sak thatna tur cheng vbc. 225.71 chu IOCL chuan July ni 4, 2024 khan a rawn sanction – a,Mualkhang Bottling Plant hi zawhfel a nih hunah chuan 30 Thousand metric ton per annum (30 TMTPA) ni khata Gas Cylinder bur 7000 vel pe chhuak thei tura duan a ni a. A hmunah hian 900 MT (cylinder 63300) vel chhekkhawl theihna a awm nghal dawn a. Khuarel chhiatna leh chhan hrang hrang vanga inkalpawhna buai thulhah pawh ni kua atanga ni sawm chhung mamawh dahkhawl theihna hmun tura ruahman a ni, an ti a.
Mualkhang Gas Bottling Plant a puitlin ngei theih nan hian, Mizoram Chief Minister Lalduhoma chuan IOCL Chairman hnenah Mualkhang Bottling Plant sak that a nih theih nana biak ngaite a biak bakah Supply Minister B. Lalchhanzova, Revenue Minister ni bawkin ram mamawh atan Land Lease Renew leh ram mamawh belh atan Land Lease extension rang taka a tih avang te, hna tan vat a nih theih nana Compensatory Afforestation tur ram rang taka a hmuhsak avangin, hnathawhna tur sum pawh hi rang taka Sanction a ni bawk a ni, an ti.
Chief Minister Lalduhoma leh Supply Minister B. Lalchhanzova ten theihtawpa hma an lakna zarah hetiang rohlu Mizoram in kan nei thei dawn ta hi, ZPM Thalai Hqrts chuan lawmawm a ti hle a, kan Chief Minister leh Supply Minster hi kan chhuang takzek a, Ram leh Hnam tan an kalzelna turah duhsakna sang ber kan hlan a ni, tiin an thuchhuahah chuan an tarlang bawk.