Champhai district chhim lam, East Tuipui bial chhungah ‘hnah khawr pangang’ tia sawi a puang a, loneitu chhungkaw 295 a ti buai hman a, tunah erawh control chhoh a ni tawh.
Agriculture and Farmers’ Welfare department hotute’n an sawi danin, ‘hnah khawr pangang’ hi June thla tir atang khan East Tuipui bial chhung khaw hrang hrangah a in lar tan a, buh hmun a bei deuh ber. Champhai District Agriculture Office-in reort an dawn tawh chinah khaw 7- Leisenzo, Sesih, Khuangleng, Farkawn, Mualkawi, Tuipui leh Hruaikawn ram chhunga loah te pangang hi in larin, chhungkaw 295 lo a ti buai a, ram hectare 169 vela zau a nghawng a ni.
East tuipui bial chhunga Pangang puang chungchanga deparment hmalakna te a zawhna chhangin Agriculture Minister PC Vanlalruata chuan, pangang in tlangram lo, buh hmunte a bei tih an hriat veleh hma an la nghal a, rannung thahna hlo te a theih ang anga sem a nih thu leh tun dinhmunah chuan pangnang puang chu an control thei tawh tih a sawi a, pangang puang hi Fall Army Worm ang a ni lo a, control harsa a ni lo a, buh pawh a eichhe nasa lo tih a sawi bakah East tuipui bial chhung bak hmun dangah chuan a in lar lo nia an hriat thu a sawi.
Agriculture department-a mithiam ten an sawi danin, Pangang puang hi ‘hnah khawr pangang’ an tih mai, sap tawnga ‘leaf folder’ an tih chi a ni a, thla ti chhe tuah chuan a che na lo ber chi a ni a, phengphehlep chu buh hnahah in khawrin tui nan a hmang a, buh hnah leh a kung te chu a ti chhe thei a, mahse tuna pangang puang mek hian buh a ei chhe nasa lo a ni.
East tuipui bial chhunga Agriculture department-a thawk ten an sawi danin, kum dangah pawh leaf folder pangang hi East Tuipui bialah a in lar fo tawh thin a, mahse buh a ei chhe tam ngai lo a, buh thar a tlahniam phah lo tih an sawi a. Kumina pangang puang leh pawh hian nghawng a neih leh loh an beisei tih an sawi a ni.