- Lallunghnema, Charity Lodge
Consumer-te lalna ram din a nih theih nan theihtawp chhuahin ka thiante nen kan bei thin a. Duhthusam ni lo mahse mipui rilru kan hneh hret hret a, mi fingin an hre thiam telh telh niin hriat a ni.Hetih laiin mi thenkhatin â min ti a,tul lo ti pael an awm bawk.Mahse,mi tam zawkin min thlawp lawi si a ni!
Hmun hrang hrang, kil hrang hrang atangin ‘support’ kan dawng zel a bawk. He consumer politics hi a thûkzia kan hre zel dawn a ni.
He kan thil buaipui hi keini chuan ‘consumer-te tana chanchin tha,’ kan ti ve tawp mai a. Consumer chang lo, dawrkai, sumdawngte tan hlei hlei he consumer thu inthup hi a tha in belh chian a dawl hle dawn a ni. Consumer-te innghahna chu ‘hralh tam chuan thawh chhuah a tam, lei tam chuan a hlawk’ tih a ni a. Dawr nghaktu chu a inhralh tam chuan a hlim thin a, dawrkai chu a inhralh tlêm chuan a lungngai thin. Customer tamna apiangah thil zuartute an hlim thin. Customer kan tih hian consumer nen sawi hran loh tur a ni. Zalênna hi consumer-te chan ngei ngei tur a ni a.Consumerte zalenna hmunah chuan mipui an thawveng thin a ni. Hnam hnufualah consumer-te tan zalenna leh hlimna a awm thei lo.Hei hi tuna Mizote dinhmun a ni em? tih hi zawhna pawimawh tak a ni. Changkannna chu consumerten an chanpual an channa hmunah zel a thleng thin a ni si a. Thil leitute zalenna awm lohnaah thil reng reng hi a hnawk nuai mai a ni. Rorelna fel pawh a awm thei lo thin a ni. Mipui zalenna chu consumer-te zalenna a ni. Consumer kan nih vek avang hian mipui leh consumer hi a thliar hran theih loh a ni.
Kan sawi thin tawh angin consumer-te venghimtu chu Consumer Protection Act hi a ni a. He Act hman thatna hmun apiangah consumer-te an thaw veng thin a, an tan malsawmna nî a inher chhuak thin a ni. Consumer Protection Act leh Rules te hi consumer-te tan chauh a ni lova, sumdawngte,thil hralhtute leh zuartute tân pawh a ni e.
Keini Centre For Consumer. Education chuan Huapzo Policy tiin Consumer Outreach Programme chu kan lo nei tawh thin a. Hlawk thlâk pawh kan ti hle a ni.A hmasa ber atan Republic leh College Veng dawr thenkhatah ka lo nei tawh a. Dawr neitute pawh an lo inhawng hle a. Kan lawm khawp mai. Consumer Right leh Issue-te kan sawi a. MRP aia sanga thil hralh lo turte, bungraw tha leh tlo, hman tlak, buk tling chauh hralh thin turin kan in chah a. He kan hma lakna hi cable TV thenkhatah an puang chhuak nghe nghe a ni.
A tum hnihna atan ni 11 July 2024 khan Mizorama sumdawng dawr lian ber pawl VISHAL DAWR-ah Consumer Out-reach Programme chu hman a ni a. He programme kan neih hma hian Vishal Manager Muna Lal chu biak lawk a ni a. An dawra Consumer Awareness neih kan duh thu kan va hrilh a. Ani chuan lawm taka min lo welcome’ tur thu min lo hrilh nghal a. Kan programme ang chuan ka sangawi zawnpui CFCE a kan secretary Pu C. Rohnuna nen chuan Vishal Hub chu kan va pan ta a. He thil kan tih hma hian Consumer Affairs Deptt-a Consumer Affairs bik buaipuitu Pu Jacob-a te, Pu Marinate kan tlawhin pamphlet eng emaw zat min lo pe a, chungte chu he outreach programme kan hmannaah hian kan sem chhuak a ni.
Sumdawng dawr lian hmun kan thleng: Supply & Consumer Affairs thawktuten engtinnge in kal dawn, motor in nei em? min tih lai khan pawisa kan nei ve lova, chuvangin bus-ah kan kal mai ang, ka ti kha a ni a. Mahse, neih chhun sengin two wheeler taxi -ah kan inphur phei ta a. Vishal chu kan thleng thuai a. Vishal hi ka la tlawh ngai lova, a awmna zawn chu ka hre thawi tawh a ni.
Hei hi Vishal chu : A bul vela lo awmte chuan Vishal a luhna min kawh hmuh a. An manager hmeichhia hleitling zet zawt chuan min lo lawm a. An naute zinga pakhat chuan portable Mike in ‘Consumer Centre hruaituten Consumer Awareness an nei dawn a. In chung lamah hnathawktute kal khawm nghal tur a ni e” tiin a puang lauh lauh mai a. Min lo dawnsawn danah lawmawm kan ti phawt!
Tichuan, an hotunu chuan an naute hnenah chuan “Hei consumer hotuten Consumer Awareness Programme an nei dawn a.Kan hriat tur pawimawh tak tak min hrilh dawn a, ngun takin kan ngaithla anga, zawm kan tum dawn nia” tiin kei chu thusawi turin min sawm a, hun ka lak hnu chuan kan Secretary thianpa C. Rohnuna chuan thu a sawi ve leh a. Chumi hnuah an Manager nula fel chuan lawmthu fuihna thu a sawi a ni. Hun kan hmang rei lo. A tha a ni! Consumer Right kan sawi a, rinawm a tul zia kan uar hle. Hawihhawm taka customer te lo dawng sawng turin kan chah bawk. FCS,&CA buatsaih track kan sem nual bawk.
He Dawr lian leh lar tak hian Mizoram mai ni lo, India ram khawpui hmun hrang hrangah Dawr an nei a. An customer, tupawhin Cash memo an neiha, an thil leia an lungawi loh chuan Vishal dawr khawi hmunah pawh an thil lei chu an thleng thei a ni âwm e. An ti tha hle mai. Sumdawng dangte tan an entawn tlâk êm êm a ni.
Hetianga Consumer Outreach neih hi a zawng chhang tlak hlein kan hria a, neih zel pawh kan tum a ni.
Kan lo inzir na turin hmanni lawka Online Shoping neitu pakhat hnena ka message thawn hi ka’n pho chhuak ang e.
“CUSTOMER THIL CHAH LOH ZAWK IN CHAH KHA IN THIAM LOHNA A NI. CONSUMER ACT,2019 BAWHCHHIATNA A NI. IN THIAM LO A NI.
IN CUSTOMERTE HI ZAH RAWH U. CUSTOMERTE ZARA SUMDAWNG IN NI. CONSUMER THIL HI KA LO BUAIPUI REI TA FÛ MAI A. HETIANGA HAWIH HÂWM LO TAKA CUSTOMER DEAL HI KA HRE NGAI LO. COURT IN HLAU LO A NIH CHUAN IN THU THU A NI. KEI CHUAN SAWI TUR KA NEI TAWH LO. HETIANG CASE HI KA BUAIPUI RENG A. KA BUAIPUI RENG DÂWN BAWK. MIPUI TANA DING KA NI A. KA HUAISEN LÊM LO. MAHSE, THU DIK HI CHU KA ÛM ZUI ZÊL THIN ” – Hnema, Consumer Activist.