July ni 27, Inrinni khan LZ Juice MLP 11 round 5 khelh zawh a ni a, inkhel ngaihven hlawh takah Aizawl FC chuan champion lai Mizoram Police FC an sawp a, hmahruaitu Chanmari FC nen an inkar an tizim. Inrinnia inkhel dangah Chawnpui FC in point thum an hmu ve bawk.
- AFC 4-1 MPFC
MPL a team lian pahnih, champion tawh ve ve Aizawl FC leh Mizoram Police FC te inkhel tur hian ngaihven a hlawh a. Inkhel hmuhnawm tak a nih ngei rin a ni a, chak zawk an awm a nih pawhin harsa taka chak tura ngaih an ni. Inkhel harsa tura ngaih ni bawk mah se Aizawl FC an khel tha viau a, si an phur hmasa chungin 4-1 ngawtin an chak let a, hnehna lian an chang.
Champion lai Mizoram Police FC hian Aizawl FC lakah bul an tan tha viau a, goal an thun hma hle. Inkhel tan atanga minute rukna lekah F Lallawmkima chuan hmahruaina goal a thun. Goal thun hmasa zawkah an tan vangin MPFC an phur a, inrintawkna sang zawk nen an inlan chhunzawm theih phah bawk. Phur takin inlan bawk mah se Lawmkima goal hian AFC a chhaihkawlh a, goal li ngawt an chhuah zui ta daih thung.
Goal chhuah hma viau mah se AFC an insiamtha thuai a, si an phur rei lo. Minute 17-naah Lalbiakdika chuan goal thunin an si phurh a sut. Goal khat ve ve an thun hnuin inkhel a hmuhnawm chhunzawm viau a, goal thun tumin an innawr tawn nasa viau naa chawlhlawk hmain goal thun belh thei an awm lova, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm viau a, goal thun tumin tha an thawh dun nasa hle. Goal lut a awm belh theih lawk loh hnuin AFC in a tawp an khar tha a, hun tawp dawn hnaih lamah goal thum ngawt an thun. MPFC laka an si phurh sutna goal thuntu Lalbiakdika chuan minute 77-naah AFC hmahruai letna goal a thun. ‘Kuriz man of the match’ a thlan zui tak Lalbiakdika hian minute 82-naah AFC goal thumna thunin hatteick a siam a, an hmahruaina a tizau.
3-1 hma an hruai hnuin Aizawl FC an inringtawk viau tawh a, an khingpui MPFC in goal thun tur khawpin an nawr tlang thei tawh lo. 3-1 a hmahruai tawh AFC tan hian hun pangngai a tawp hnu minute 90+4-ah Augustine Lalrochana chuan an chakna nem nghet leh zual turin an goal lina a thun zui leh a, 4-1 a hnehna changin point thum hlu tak an hmu zui ta a ni.
Champion lai Mizoram Police FC lakah an chak vangin Aizawl FC hian hmahruaitu Chanmari FC nen an inkar an tizim a, an inkarah point hnih bawk a tlazep leh. Season kal mekah tlawm nei lova kal tluang mek Aizawl FC hian khelh nga atangin point 11 an hmu a, point 13 hmu mek Chanmari FC hnuaiah awmin pahnihna an ni chhunzawm zel. Champion lai MPFC hian khelh nga atangain point 6 an hmu a, palinaah an awm chhunzawm ve thung.
- Chawnpui FC an chak
Inrinni a inkhel hnuhnung zawkah Champion hlui Chawnpui FC chuan MPL team thar FC Bethlehem an hmachhawnin, hnehna an chang a point thum an hmu.
Table hnuai lama awm mek pahnih Chawnpui FC leh FC Bethlehem te inkhelah hian goal a lut hma a, inkhel hmasa zawk ang thoin goal thun hmasa team tlawm zawkah an tang ve leh. Season kal meka chak la nei lo FC Bethlehem tan inkhel tan atanga minute rukna lekah Denny Zorammawia chua hmahruaina goal a thun a, an chakna tur ni a inherchhuak ve dawn ta nge nge a ngaih a ni hman.
Hma taka an si phurh hi Chawnpui FC lamin hun rei tak an sut thei lova, hnufual zawk ni chungin chawlhlawk an hmang hial. Chawlhlawk hmain goal thun thei lo mah se chawlhlawk hnu lamah erawh goal an thun ta thuai thung. Minute 51-na lekah Zothansanga chuan goal thunin an si phurh a sut. An si phurh an sut atanga minute 10 hnu lekah Lalramnunmawia chuan Chawnpui FC chakna goal a thun a, point thum an hmu zui ta a ni.