Vawk pul hri, African Swine Fever avanga vawk chan te’n sorkar atanga puihna an beiseina chu a takah a chang chho dawn niin a hriat a, hri leng hi Disaster ah puan a nih chuan zangnadawmna pawh a awm thei dawn a, thu tisaa chantir turin State Disaster Calamity a puan a nihna tura rawtna file chu Chief minister kutah a awm mek.
ASF hri leng State Disaster a puan chungchang hi thawm a lo awm fo tawh a, Vety department in an rawtna chu ngaihtuah te ni thin mahse a hlawhtling zo ta thin lo.
Vety minister C. Lalsawivunga’n ASF chu state disaster calamity a puan a nih theih nan state disaster management authority hnenah an thlen a, chief secretary hoin uluk takin kil hrang hrang hrut chungin an ngaihtuah a, hemi hnuah Chief minister hnenah thlen lehin tunah hian CM ah file a tang rih tih a sawi a, an rawtna chu a hlawhtlin an beisei hle tih a sawi.
ASF hi state disaster ah puan a nih chuan vawk pakhat thi ah zangnadawmna Rs. 4000 te a awm thei dawn tih Vety minister chuan sawiin,”Vawk chante tan sum tam tham a ni kher lo ang mahse hmuh let awm lo ngawt ai chuan a zia deuh ang” tiin a sawi.
ASF hri len tan kum 2021 atanga kumin july ni 15 thleng khan ASF vanga vawk thi leh suat hi a vaiin 89966 a awm tawh a, heta sum hloh hi cheng vaibelchhe 707.96 a tling hial tawh.
Hri leng tan kumah vawk thi avanga sum hloh hi cheng vaibelchhe 334.14 vela chhut a ni a, 2022 ah cheng vaibelchhe 210.32, 2023 ah cheng vaibelchhe 15.77, kumina vawk thi tawh hlut zawng chu cheng vaibelchhe 147.73 hu nia chhut a ni bawk.