- Lallunghnema, Charity Lodge
He kan chènna Zoram zîm têah hian mi chi hrang hrang hi kan awm a,mi dum,mi hang,mi ngo,mi eng te awmin ze hrang hrang kan nei bawk a.Sumdawng, sum duh tak,chapo tak hmuh tur an tam hle,chutih laiin sumdawng zingah mi thil phal leh inngaitlâwm êm êm,retheite thian hmuh tur an kat nuk bawk.Mi thiam,changkang consumer right ngaihsak tak,mi thiam,mahni right ngaihsak miah lo an awm bawk.Heng.mi chi hnih te hi consumer an ni ve ve a, consumer lal rama chen an duh vek bawk.
Pawisa che leknaah hian mihring mizia a lang thin. Sum tel tawhnaah hi chuan sumdawng pam ham leh chapo tak tak an inlar thuai thin.Hengho hi dawr an hrehawm tlangpui. Sumdawng tha chu dawr an nuam,an chapo ve lo.Consumerte tan malsawmna an ni thin.
Ni khat chu tlangval fel tak phakhat hian computer siamna centre -ah iPad siam turin a dah a. He computer siam thiamte hian an siam that sak theih tur thu an lo hrilhin ngaih tha takin a ‘khawl’ chu a dah a ni. Mahse, he thil siamtute hian thla khat chuang fê hnuah pawh an lo siam thatsak chuang lova. An kawl reng ringawt a.Siamthat chu sawi loh, chu ‘khawl’ chu an lo tihhmêlhem sak ta zâwk a. Eng mah an lo siam that sak loh bâkah thla khat leh a chanve chuang zet an lo kawl ringawt pawh kha lungawi lohna tham a tling a ni. Deficiency in service a tling a ni.An thutiama an rinawm loh avangin he tlangval nen hian an thu a inbât sual ta a. A tirah khan khawl chu an siam that theih loh thu tha takin hrilh mai se, tha tur a ni a. An siam loh bâkah zahna reng reng an ni liva,inthiam lohna pawh an nei hek lo.Hetiang mi hi consumerte khawvel chawk buaitu an ni a.Sumdawng fel te tihming chhetu an ni. Tichuan,an inkar boruak chhe tak hnuaiah he tlangval hian a khawl chu a la chhuak leh ta a ni.
He tlangval hian kei Consumer activist chu a harsatna tawh dan min hrilh ta vek a. Kei chuan Computer siam tute chu ka han biaksak ve ngawt pek a. Keini pawh chu kan inhnial ve ta hrep mai a. A zia lo khawp mai.
He sumdawng pa hi thil awmzia hrilhin hetianga, “Kan siam thei, kan siam thei,” ti a, siam sak leh si loh,bungrua lo kawlsak reng leh khawl tih hmel hem hi deficiency in service a tling a ni. Chuvangin Consumer Protection Act 2019 bawhchhiatna a ni a. Consumer Court – ah khin theih in ni asin ti a tha taka ti ti pui ka tum laiin min chhâng lawk ta zêk a, kan ti ti thei ta meuh lo……..a hah thlak khawp mai. Kei hi chuan hetiang sumdawng chapo ho hi ka khawngaih leh ve tlat pek a nih chu!
Hetiang mihring hi malsawmna keng tlâkah kei teh lul hian ka ngai lo.
Tum khat chu, Mualpuia cheng nu pakhat hian Television a lei a, a lei atanga rei lo têah a ‘picture,’ a lang tha thei lova. Tichuan,he nu hian he tv zuartu hnênah hian an han report a,anni tv zuartute chuan”Lo en ve mai mai rawh u, ” an lo ti sam êt a ni âwm e. He nu lungawi lo hian a thil tawn chu min hrilh a. (ka hnenah a zualko a nih ber chu-llh). Tv(tlangval tihna a ni lo a nia-llh) zuartute chu ka han phone ve ta a. Anni chuan hawihhâwm takin “Awle, Awle! kan lo ensak a nge ,” tiin a thlâwnin an lo siam thatsak a.A siam man an chawi loh avangin an lawm hle a,kei pawhin ka lawmpui a ni.. He tawngkam “Awle, Awle! ” tih hi ka bengah a châm ta reng mai a. Thupuiah ka hman phah ta a nih hi! He sumdawngpa dawrah hian hun remchang hmasa bera lèn ka duh. Pathian malsawmna tam tak dawng tur pawhin duhsakna ka hlân e.
Sony Mobile Rs 50000/- chawitir thu:
Sâp tawnga a inziah dan ka han sawi hmasa ang e.Ti hian,”Consumer Court orders Sony Mobile to compensate a woman Rs 50000/-for service lapse.”-Law trend.
Vai nu pakhat Bairagi chuan Guwahati,Christian Basti – a inbun Sony Centre leh Rajgarh Main Road a awm Sony Service Centre chu Kamrup District Consumer Disputes Redressal Commission hmaah chuan a khing ta a.A tawi thei ang berin han sawi ila,he Consumer Commission hian ni 26.July.2024 khan Judgement ,&Order tichhuakin he service provider Sony Service Centre hi hna,’ thawk chhia’, puhin Consumer Protection Act 2019 hmangin hremna a pe ta a ni.Sony hian singnga bakah mobile phone man Rs 2990/- ,a vaiin 52990/- complainant hi ni 45 chhungin a pe kir leh (refund)ngei tur a ni.
He ka thu ziak atang hian lo inzir rawh u,tiin chhiartu zawng zawngte ka ngen a che u.
- I thil leiah i hlim em?
I thil hmannaah i lungawi zel em?
Harsatna i neih chuan min hrilh ta che.
I fimkhur loh avangin i hah phah a.
I ngaihsam avangin i buai thin a nih kha.
Centre For Consumer hi i tana din a ni e.An hnenah hian i zualko thei.A thlâwnin an lo pui thin ang che.
‘Kâr lehah kan ti ti leh ang. He article i chhiar atanga i rilru a thil awm te min hrilh ta che.