Ni hnih awh khuai khâwi zirna training, Mizoram Pollution Control Board leh Mizoram KVI Board-te tangkawp buatsaih chu nimin September ni 13 (Zirtâwpni), 2024 chawhnu dâr 3:00pm khân khâr a ni a, he training hi ‘Multi-Disciplinary Training Centre (MDTC), Mizoram KVI Board, Zemabawk-ah neih niin School Eco-club hrang hrang 17 atangin incharge teacher (Green teacher)-te’n Resource Person Lalsawmliana Sailo, Executive Officer, Mizoram KVI Board kaihhruaina hnuaiah khuai khâwi dân hlawhtling takin an zir chhuak a ni.
He khuai khâwi training hi Ministry of Environment, Forests and Climate Change (MoEF&CC) sponsor niin Environment Education Programme (EEP) kal tlanga buatsaih a ni a, India sawrkârin Environment humhalhna kawnga program pawimawh tak a kalpui mêk Mission LIFE tihhlawhtlinna atâna buatsaih a ni. Environment Education Programme hnuaiah hian Mizoram Pollution Control Board chuan Mizorama sikul leh college hrang hrang sânghnih dâwnah eco-club hi a din tawh a, Eco-club naupangte hnênah Mission LiFE chungchâng inzirtirna hi nasa takin a kalpui mêk a ni. Environment humhim a nih theih nân nunphung hluite kalsana environment tâna tlo leh tha zâwk nunphung dik thlang tura zirtirna pêk bâkah environment tâna tangkai thiamna, skill pêk hi a tum ber pakhat a ni. Kan ecology leh environment tâna thil tangkai tak a nih avângin khuai khâwi training hi huaihawt a ni a, eco-club school compound-ahte leh sikul bul hmun remchângah khuai bâwm hûngin eco-club zirlai naupangte’n zirtirtute kaihhruaina hnuaiah khuai khâwi hi an lo tizui dâwn a ni.
Eco-club incharge teacher, he training-a lo telte hian Certificate bâkah khuai bâwm leh khuai khâwi kalpui nâna hmanraw mamawh chi hrang hrang an dawng a ni.