Lalremsiami telna India hockey team-in Women’s Asian Champions Trophy title an humhim a, nilaini final-ah si khat faiin China an hneh.
Rajgir Hockey Stadium, Bihar-ah Deepika Sehrawat chuan goal awm chhun a khung a, minute 31-ah penalty corner atangin goal ding lam kilah a thai lut a, Deepika hian tournament chhungin goal 11 thunin khung tam ber a ni.
Asian khawmualpuia ranking sang paruk inelnaah hian world ranking-ah China sang ber mah se a vawi thum nan India hmeichhe team an champion a, group league-ah si thum faiin China an hneh tawh a, final-ah hma an sawn a, goal veng tha viau chungin chak phuin Siami telna India team-in an nawr a, tournament chhunga vawi sarih an khelhah chak vekin phu takin an champion a ni.
Mizo nula Siami’n tournament chhungin rahbi thar tukin ram tan vawi 150 a khel tling a, semifinal-ah goal hlu tak khungin Japan lakah si hnih faiin hnehna an chang a ni.
Tournament thlengtu leh sponsor-tu Bihar sorkar chuan Asian Trophy champion India player-te hnenah cheng nuai 10 theuh a pe dawn a, Chief Coach Harendra Singh-a hnenah nuai 10 pe bawkin coaching staff dang hnenah nuai 5 theuh an pe bawk ang.
Hockey India chuan player-te hnenah nuai 3 theuh pe ve thungin coaching staff hnenah nuai 1.5 theuh a pe dawn tih a puang a, champion team-in lawmman pawisa fai dollar singkhat an dawng ve thung a ni.