Aizawl: Excise & Narcotics Department thawktute chuan nimin khan Commissionerate of Excise & Narcotics Building Conference Hall-ah kum thar inhlantharna an nei.
Inhlantharna inkhawm hi T. Lalramzauva, Deputy Commissioner chuan a kaihruai a. Z. Lalhmangaiha, Commissioner chuan department-a hnathawkte chu zu leh ruihhlo dona kawnga hnathawk niin, an hna chu Pathian pek a ni tih pawma phur tak leh rinawm taka thawk turin a chah.
Z. Lalhmangaiha chuan Mizoram sorkarin ruihhlo do a ngai pawimawh a, district office thar pathum hawn a ni a, thawktu indaihlohna te theih ang anga hnawh khah a nih thu te, department thuamchakna tur leh mamawh tam tak ngaihtuahsak zel a nih avangin sorkar chungah lawmthu a sawi a. Minister inpe leh taima tak, Lalnghinglova Hmar kaihhruaina hnuaia tun hmaa Aizawla zu zawrhna hmun, ‘A sen chi Lane’ tia hriat thin, tuna ‘Venbuk Lane’ tia thlak tak hmuna zu leh a zuartute tihbo a ni te hi a lawmawm a, tun aia nasa leh inpekna thuk zawk nen kum 2025-ah zu leh ruihhlo leh a kaihhnawih donaa hma la nasa zual zel turin thawktute a fuih bawk.
- Kum liam taa ruihhlo man
Excise & Narcotics department chuan kum 2024 chhung khan rakzu litre 67,911.515 leh heroin kg 46.566 an man.
END-in an tar lan danin, nikum chhung khan zu bilh lai tin 1,26,337; zu siamna bungbel 2,933, dawidim kg 181.577 bakah zu ang chu IMFL (750 ml) bottle 16,559, IMFL (375 ml) bottle 5,908, IMFL (275 ml) bottle 127, MFL (180 ml) bottle 11,660, beer (650) bottle 177, beer (500 ml) can 36,500, beer (300 ml) can 35, FML (1 Lit) bottle 143, FML (700 ml) bottle 307 leh BEDC litre 4,119.840 an man.
Nikum khan heroin kg 46.566 an man a, Ganja kg 586.636, khuh damdawi phial 6,366, Alprazolam tablet 7,523, Nitrazepam tablet 6,129, Diazepam tablet 2,580, Tramadol tablet 168, Methamphetamine kg 138.817 bakah, ruihhlo kaihhnawihah lirthei 93 an man bakah dan bawhchhia mi 7,309 an man bawk.