Mizoram Governor hlui Hari Babu Kambhampati chu Odisha Governor atan Zirtawpni kalta khan lak luh a ni a, an lak luh ni hian Mizo designer kutchhuak ngat a inbel.
Hari Babu Kambhampati thuam inbel hi Mizo designer lar, Escape Engmawia kutchhuak a ni. Mizoram larsap hlui hian Odisha Larsap ni tura thutiam chham a, an lak luh ni-a a inbel tur liau liaua an design a ni.
Hemi chungchanga Thalai Times zawhna chu Escape Engmawia chuan, “Kan Larsap kalchhuak ta leh a nupui hian Krismas dawn khan an rawn order ve ngei a. Mahse, slim fit ang hi a la ha ngai lo. A nupui nen ha turin kan hmin thei hram,” tiin a chhang.
Mizo designer chuan sawi zawm zelin, “Mizo designer zingah a thiam ber pawl an ti che a. Chuvangin, eng rawng nge ka inhmeh ber ang, i duh ber min tihsak rawh a tia. A rawngte leh a puante kha ka thlan sak vek bawk a. An nupa pawh an lawm, keipawh ka lawm. Larsap ADC (Aide-De-Camp) ho pawhin fiamthuin Escape-a chiahin hetiang ha tura Larsap hmin thei min ti fiamthu vel a,” a ti.
“Mizoram Larsap hlui ni ta, Dr Hari Babu Kambhampati hian, vawi hnih ngawt a Bangla-ah high tea min buatsaih sak tawh bawk a,” tiin, vannei a intih thu Escape Engmawia hian a sawi bawk.