India independence ruala India, Burma leh East Pakistan a then darh ve nghal Mizoten vawiin thlenga kan rilru a thi thei lo insuihkhawm lehna kawng chu BJP sorkar hnuaiah khar a nih dawn hmel ta hle mai. Nikum kumtir lama India home minister Amit Shah-a’n Guwahati a Assam police commando training chhuakte hmaah India hmarchhak a Myanmar ramri chu hung vek anih tur thu a puan atang phei kha chuan a takin kan tawng chho ta mek a ni ber a, kumin January ni 1 atang khan Zokhawthar gate pawh khar a ni ta bawk.
India hmarchhakah hian India leh Burma hian ramri km 1643 lai a nei a. Ramri hi state pali in neiin Arunachal in 520 kms, Nagaland in 215 kms, Manipur in 398 leh Mizoramin 510 lai kan nei a. Heng ramriah hian a tawn tawnin hnamte hi kan inchen pawlh vek a. Hnam khat then hran tak an nih avangin India sorkar chuan ramri hnaiha cheng hnamte chu khawvel dana passport ngai lovin ramri atanga 16 kms chhunga chengte chu duh duha intlawhpawh tawn (Free Movement Regime) a phalsak a. Inneihpawlh leh chhungkhat intlawhpawh tawn pawh he FMR dan hian zalen takin min phalsak a ni. Keini Mizote pawh Burma leh India a chengte chu kawng engkimah kan inpawh tawn vek a. Kan thinlungah pawh engtik niah emaw chuan kan hnam hi ram pakhata awmin hnam hlawm lian takah kan la insiam ve ang tih kan ngaihtuah a. Chutiang tho chu Naga te hi an ni bawk.
Amaherawh chu hun lokal zelah India rama sorkarna chelh mektu BJP chuan helai kan intlawhpawh tawn hi hnawk a ti ta tlat mai a. India hmarchhaka helna leh buaina a reh theih lohna chhan lian berah a puh ta bawk. Chuvangin tunah hian intlawhpawh tawn phalna dan chu titawpin ramri 1643 kms chu hung phui vek a tum ta a ni!
Hung phui vek lo ni ta sela Mizote tan engnge lo thleng ta ang? Khawvela kan awm chhunga Mizo hnam chu hnam lian leh zahawm, hnam changkanga dinchhuah kan tumna duhthusam ram chu beisei tur a awm thei tawh dawn lo a ang ta viau mai a. Zo-reunification tia political party rilru pu hauh lova hnam rilru kan lo pu a, insuihkhawm kan lo beisei tlat hi engtinnge kan chhunzawm tak ang le? United Nations chuan khawvel a hnam thlahkhatte hi rorelna khat hnuaia an awm theihna turin a bei ngar ngar a. Chutih laiin keini chu min awptuten min then darh hlen tur zawngin hma an la ta si. Engtinnge he unau pawhdarh tumna hi kan hmachhawn tak zel ang le.
Ngawi rengin kan tuar mai dawn nge kan hnam insuihkhawmna tur hian ke kan pen tan ve dawn? Hnam hmangaihtuten aw an neih a va hun lehzual ta em. An chak zawkna hmanga min neksawrtute hi kan nek let ve dawn lo’m ni. Hnam thisenin min au tan ta.