India ramin ama puala buatsaih danpui a hman tanna ni, Republic Day 2025 chu India ram hmun dangte rualin Mizoram hmun hrang hrangah Pathianni khan lawm a ni a. Mizoram chhunga Republic Day vawi 76-na lawmna program lian ber chu Pathianni zing dar 7:30 khan Aizawl Sipai Lammualah neih a ni.
Larsap Vijay Kumar Singh chuan India hnam puanzar pawt parhin parade contingent 23-ten hnam puanzar zahna chibai an buk chu a chhan let hnuah thu sawiin, Republic Day pualin Mizo mipuite duhsakna chibai bukin, “He ni pawimawh takah hian kan tana hman tur danpui kan insiamsak a, hei hian dikna, zalenna leh intluktlanna min pe a ni,” a ti.
Danpui leh zalenna neih theih nana theihtawp chhuahtute chu he ni pawimawhah hian hriatreng an nih thu sawiin larsap chuan, India ram inpumkhatna leh inunauna tichaka vawn nun tum tura mipuite a sawm a. Mizoram chu chenna nuam, zahawm, ralmuang, hlawhtling leh hlimna hmuna siam tum turin a sawm bawk.
Sorkar hmalakna leh hlawhtlinna tam tak zinga langsar zualte sawiin larsap chuan, sorkar flagship programme Bana Kaih hnuaiah mahni kutkawiha eizawng leh kuthnathawkte puih tum a nih thu leh hei hi India ram intodelh ‘Viksit Bharat @ 2047’ hlen chhuah theih nana pawimawh tak a nih thu a sawi a. He scheme hnuaiah hian Progress Partner-te chu hmalakna tur loan pek an nih dawn mai bakah sorkar chu quarantor-ah a tang dawn a, partner banks – SBI, MRB leh MCAB te nen thawhhona thuthlung ziah fel tawh a ni, a ti a. He scheme hnuaiah hian Chief Minister’s Special Category Scheme tanpuina Rs nuai 1 thlenga dawn theihna a awm thu te, thlai thar thlan bik pali sawhthing, hmunphiah, aieng leh hmarcha ahte minimum support price sorkarin a ruahman thute a sawi.
Larsap chuan Mizoram chu state ralmuang tak a nih thu leh Assam nena ramri buai chin fel tuma tan lak mek zel a nih thu a sawi a. Security agency hrang hrangte hmalaknain dan lova ramri kaltlanga kuhva, drug, ralthuam leh puak thei tawlhruk thahnem tak man a nih thu sawiin, dan lova thil tih leh ruihhlo do kawngah sorkar, NGO, kohhran leh khawtlangte thlah lova tanho zel a pawimawh thu a sawi bawk.
Republic Day-ah hian Police, Excise & Narcotics leh Fire & Emergency Services hnathawk tha chawimawina leh khawpui fai intihsiakna lawmman chu Larsap hian a sem bawk.
Larsap thusawi thenkhat dangte:
- Nikum chhungin PWD in kawng km 194 a thui sial hna an thawh bakah, km 264 an black top a, km 98 a thui high strength concrete road an siam.
- Kawlphetha intodelh turin theihtawp chhuah mek zel a ni a, pre paid smart meter pawh hman thuai tum a ni.
- School thar building 14, Classroom 35, toilet block school 43 ahte leh school chei that hna18 kalpui mek a ni.
- Zirtirtu indaihlohna phuhruk nan engemawzat lak belh an ni a, National Education Policy 2020 phut angin State pual University din tum a ni bawk.
- Health Clinic pathumte Health Sub-Centre-ah leh PHC 7-te CHC ah hlankai an ni.
- PMAY (G) hnuaiah in 25,361 sak tawh niin, sak mek 4,605 a awm.