- Vanhmingliana, Dawrpui
“Take time to be Holy” William D. Longstaff-a hla chuai thei lo behchhan hian Kumthar Thuchah i’n sawi ve leh teh ang. He hla hi kum 1882 daiha phuah tawh nimahsela vawiin thlengin kan thinlungah a tharin LALPA min siamtu chanchin leh duh dan min zirtir zel avangin a hlu a ni. A hla ngau ngau leh a phuah dan vel sawi tum ka ni lova, a thupuiin a duh dan kalpuia he kumthar 2025 kan kalpui dan tur zawk sawi hi kan tum chu a ni ang.
Kum a lo thar veleh hian hlen tum (Resolution) te kan insiam thin. Mihring chakna leh theihna hi chu a tlêm êm avangin reiloteah a ral leh thuai thin. Kan thil tum tha tak tak chu khawi atangin nge a hlawhtlinna kan hmuh theih tak ang le?
Mi tupawh, thlarau lama an pachhiatzia inhrechiang, anmahniah thil tha chhuan tur pakhat tê pawh a awm miah lo tih hretu te chuan Isua enin, chutatang chuan chakna leh felna an lo hmu thei ang. Ani chuan, “Nangni thawkrim leh phurrit phur zawng zawng te u, ka hnenah lo kal rawh u” tiin min sawm a. Kan pachhiatna chu khawngaihna nena inthleng puiah min sâwm anih chu! Pathian khawngaihna dawn phu kan ni lo a, mahse kan thiamchanna Krista chuan a phu thung – a hnen pantu te zawng zawng chu an duh a hlawhtlintir vek thei.
Kumthar kan hman chhoh dan tur leh kalpui dan turah hian kan chhungte leh kan ram hruaituteah a innghat lo. Kan chak lohna, tanpuitu nei lo leh beidawng tak kan nihnaah hian Isua pan mai ila, Ani lainatnaa khat, chhandamtu chuan hla taka i la awm lai ngei khan a rawn pan nghal ang che. A hmangaihna bân chuan a kuah dawn che a ni.
Ruihhlo laka kan fihlim theih lohnate, biak In lam pan tura kan ke min pawhbehsak tlat tu te, kan eizawnna kawng tura kan hlawhtlin theih miah lohna te hi min hriatpui reng thintu a awm a ni tih hi i theihnghilh lovang u.
Kan taksa Pathian hlimthla (image) a siam, a siamtuin hlu taka a ngaih hi i duat thar hle bawk ang u. Tlo tak leh rei tak a daih theihna turin a ngeih zawng leh a thatpui tur thilin châwm ila; ei loh tur leh tih loh tur erawh hnualsuat ngam ila! Mu nileng leh phone khawih mai mai a hun hmang lovin taksaa thisen awm te leh oxygen te bung hrang hranga a insemdarh theihna turin kawng chi hrang hrangin chêt tir bawk ila. Mi hrisel leh dam tha te hian damlo natna na tak tuar te ai chuan Siamtu Pathian fak leh chawimawi hi nuam an ti zawk thin a nia!
Keimahnia hlenchhuah leh tum kan neih te hi kan hlenchhuah zawh loh hian a hma aiin kan hnual sawt thin a. Chu tak chu sual Setana chuan remchangah lain min bei zual sauh thin. Mi beidawng, engmah ti ve thei lo angah min chhuah ta thin.
Kan hun tha te hi chhiar dan thiam ila, tawp chin nei lo a min hmangaihtu LALPA nen leng dun ila; kan hlawhchhamna zawng zawnga min din saktu tur Krista kan nei tih hi i theihnghilh ngai lovang u. Isua Krista chu Pa hnenah i aiawha dingin, “He misual thih ai hi ka lo thi tawh a, a luhlulna leh chak lohna en lovin kei hi mi en zawh rawh” tiin Pa hnenah a lo dil tawh anih kha!
“I hun tithianghlim la, khawvel a ral mêk,
I hun hlu zawng zawng te Isua tan hmang rawh;
Amah I an theih nan Isua en fo rawh,
I thiltih zawng zawngah Amah ang turin”