Chhuitute chuan December thlaa South Korea-a thlawhna tla, mi 179 an thihnaah khan sava nen an insu ngei tih finfiahna tha tawk an hmu.
Jeju Air thlawhna chesual khawlpui pahnihah hian varak pem chi chi khat, a hlawma thlawk thin, Baikal teal an tih thla leh thisen an hmu ve ve tih Thawhtannia an chhuina chin an tihchhuahah an tar lang.
South Korean leilunga thlawhna chesual na ber chhuitute hian tunah chuan eng ang chiahin nge sava hian a tihbuai tih leh tlankawng tawpa a va insutna, concrete ding chu a that loh dan an chhui zui leh ang.
Boeing 737-800 khawlpui pahnih hi an thiat darh ang a, concrete dintir chu an endik zui dawn a ni.
Jeju Air thlawhna hi Bangkok atangin December 29 zingah a thlawk chhuak a, an ram chhimthlanga Muan International Airport pan a ni.
Zing dar 08:57, a khalhtuten tumhmun an biakpawh hnuhnung ber atanga minute thum hnuah control tower chuan ‘sava an tam’ tih thu an hrilh.
Zing dar 08:59-ah a khalhtuin thlawhna chu savain an sut thu sawi lehin mayday signal a pe chhuak.
A khalhtu hian tum loh dan zawnga tum a dil zui a, a tumna khawl a chhiat zui avangin a ke tichhuak lovin tlankawngah a tum zui ta a. Tlankawng pela tlanin a tawpa concrete ding chu a su ta a ni tih report tihchhuahah hian tar lan a ni.
Thuneitute chuan flight data leh cockpit voice recorder an endiknaah an chetsual hma chiah minute l chhung kha record a awm tlat lo tih an sawi tawh bawk.
Mi thiam, hetiang thlawhna chinchang hriate chuan concrete hi an sawisel a, hei hi awm lo sela chuan thi zat pawh an tlem zawk a rinawm niin an sawi.
Concrete dintir hi localiser tih a ni a, thlawhnaten tumna tur an hmuh mai theih nana siam a ni.
South Korea-a transport ministry chuan hetiang hi tumhmun dang, ram dangah ngei pawh hman thin a ni tih an sawi.
Kar hmasa khan thuneitute chuan concrete an hman thin hi an tumhmun lian pasarihah chuan thil dangah thlak turin an ti ta a. Heng tumhmunah hian thil dang, tlankawnga thlawhna himna tur an dah ang.
Chhuina hi United Nations-a aviation agency-ah an thehlut dawn a, United States, France leh Thailand hotute hnenah an thehlut bawk ang.