Manchester United boss Ruben Amorim chuan bench-a thu tur pawhin inpekna tak tak nei lo, Marcus Rashford ai chuan an goalkeeping coach kum 63 mi chu a duh zawk hial tur thu a sawi.
England forward hi chawlhkar ruk chhung chu United tan matchday squad-ah a tel tawh lo va, Pathianni zana Premier League-a 1-0-a Fulham an hneh tum pawhin a tel lo.
February 3-ah thlasik bazar inhawng mek khar a ni dawn a, Rashford-a hma hun tur hi a la chiang lo va, hetih lai hian Amorim chuan tu emaw chuan ‘ni tin a zawng zawngin’ thil a ti ve lo tih a sawi.
“A chhan chu a ngai a ni reng – training a ni a, chu chu footballer-in a tih tur chu a ni. Ni tinin tih ziah a ngai a ni,” tiin Amorim hian Rashford-a a hman loh chhan an zawhin a sawi a ni.
“Thil a inthlak lo a nih chuan kei pawh ka inthlak danw lo. Player tin tan chutiang vek chu a ni a, a zawng zawng tiha tha taka ti chauh kan chhawr ang,” a ti.
“Kan bench i en chuan ruak a awm tih kan hmu a; mahse, ni tina a theih ang zawng zawnga inpe lo ai chuan kan goalkeeper coach Jorge Vital pawh kan thuttir zawk mai ang,” a ti.
Thenkhat chuan kum 27 mi, Rashford-a leh Amorim-a inkarah hian khi a awm hran lo va, amah pawhin club-a la awm zel a duh niin an sawi.
AC Milan pan mai tura ngaihna chu Kyle Walker a luh tak zawk avangin a theih dawn ta lo va, Italian club hian tun thlaa English player pakhat chauh an la lut thei si.
Barcelona-a loan-a khelh chhuah lah beiseina a tlem angreng a. Camp Nou lamah hian player thenkhat an chhuah phawt a ngaih hmel a, chhuak tura ngaih Eric Garcia leh Ansu Fati te lahin chhuah mai an tum hmel bawk si lo.
Thlasik bazar inhawng mekah chawlhkar khat chuang a la awm a, United hian tumah an la la lut lo va, an chhuahtir nual tur anga ngaihna a lian zawk.
August, 2022-a £ maktaduai 81.3-a Ajax atanga an lak luh, winger Antony chuan Inrinni khan tun season chhung loan-a khel turin Real Betis a pan.
Hetih lai hian Argentina forward Alejandro Garnacho pawh chhuak mai tura sawi ri a ring hle a; mahse, Amorim-a hian kum 20 mi hi Fulham an hmachhawn khan a la khehtir.
Garnacho-a hi Craven Cottage-ah hian a thiante ang bawkin a khel tha lem lo hle a; mahse, chakna goal awm chhun an thunna kawngah tha a thawh ve thung.
Garnacho an hralh hian United hian player dang leina tur an neih theih dawn bakah financial profit and sustainability rules an bawhchhiat tur lakah an him phah thei dawn nia sawi a ni.
Red Devils hi lak luh tur lamah chuan Lecce full-back Patrick Dorgu leh Chelsea forward Christopher Nkunku te nen sawi zawm an ni a; mahse, Amorim-a chuan lak luh tur lam sawi lovin tuna a neih sa hi hman dan a la dap zel dawn tih a sawi.
“Kan inveng a. Tun hma lamin tihsual kan lo nei tawh thin a, tun tumah hi chuan tihsual nawn kan tum tawh lo,” a ti.