Aizawl: January 24, 2025 chhun khan Presbyterian Kohhran Hmeichhiain an din, Phunchawnga Women Centre-ah puan thui zir tur hawnna inkhawm neih a ni.
Puan thui zir tur hawnna inkhawm hi Sailuti, Ex-Chairman-in a kaihruai a. H. Lalfakmawii, General Secretary-in inhmelhriattirna hun a hmang a, R. Lalrinpuii, Women Centre Superintendent-in Hostel Rules chungchang sawi fiahin, Rev. Dr. K. Lallawmzuala, Executive Secretary i/c Kohhran Hmeichhiain zir turte fuihna hun a hmang a ni.
Women Centre-a puan thui zir tur hi zirlai 50 an awm a, zir hun chhung hi kum khat a ni. Presbyterian kohhran hmeichhe rorel inkhawmin a rel angin, kum 2024 atangin puan thui zirchhuakte hi puan thui khawl pek thin an ni.
Women Centre-ah hian Superintendent pakhat, zirtirtu pahnih leh thawktu pahnih, an vaiin thawktu panga an awm mek a ni.
Women Centre hi Presbyterian kohhran hmeichhe enkawl a ni a, hmeichhe dinhmun harsa leh khawsakna lama tanpui ngaite chawikanna atan din a ni. Kum 2016 atang khan puan thui zirna tan a ni a, mi eng emaw zatin an zir chhuak tawh a, kum 2017 atangin puantah zirna tih belh niin, mi eng emaw zatin an zir chhuak tawh bawk.