Aizawl: Thawhtanni chawhma khan Mizoram Larsap Vijay Kumar Singh-a’n Central YMA hruaitute lengah a sawm angin an inkawm a. Central YMA President Lalhmachhuana leh office bearer dang pangate an tel.
Inkawmnaah hian larsap chuan Mizo khawtlang nunah YMA pawimawhna leh a hnathawh te a lo hriat tawh thu leh Mizoram leh Mizo khawtlang nun siam that kawnga theihtawp chhuah zel turin Central YMA hruaitute chu a sawm.
Central YMA hruaitute hian NGO Darpan Portal chungchanga harsatna an neihte siam rem a nih theihna tura hma lak sak turin an ngen a. India Constitution 8th Scheduled a Mizo tawng dah ve a nih theihna tura hma lakpui tur leh hemi chungchanga prime minister hnena lehkha an siam chu thehluhsak turin an ngen nghal bawk.
An inkawmnaah hian Mizoram leh state dang inkalpawhna kawngpui tha hlei thei lo chungchangte sawiho a ni bawk a. Larsap hian Mizorama a awm chhunga inkalpawhna kawngpuiin hma a sawn theih nana tan lak a tum thu leh a hmunah tlawh a tum thu a sawi. Ruihhloin Mizo khawtlang nun a run nasat dan leh thalai tam tak ruihhlo bawiha an tan dan te, ruihhlo do kawnga YMA hmalak dan leh sorkar nen thawhho dan te sawi lan a ni bawk.
Larsap chuan Central YMA a chet chuan Mizo society-ah thil tam tak a tih theih thu leh mipui tanhona a pawimawh thu a sawi bawk.
Central YMA hruaitute hian YMA kalphung leh inrelbawl dante sawi langin larsap hi Central YMA hmingin khumbeu leh ipte chei an hlan nghal bawk a. Larsap hian hun remchangah Central YMA Office tlawh a tum thu a sawi bawk.