MNF Treasurer Lalruatkima chuan ZPM sorkar chu party sorkar sawhngheh an tum ngawr ngawr avangin village council leh local council inthlan neih tur chu hnawhsarum taka puangah an puh.
Thawhtannia Mizo Hnam Run chhung inkhawmah MNF Treasurer Lalruatkima chuan thu sawiin VC leh LC-te term ding lai ZPM sorkarin thla ruk chuang zetin a pawt tawi a, dan kalha a hun hmaa inthlanna a buatsaih lui tur hi mipui rorelna (democracy) kalphung zah lohna leh pawngsualna nasa tak a tlin thu a sawi.
Lalruatkima chuan June 10, 2024 khan Cabinet Minister Lalrinpuii chuan LC leh VC-te zingah an mi leh sa ni lote chu sorkar thawhpui tha duh lovah puhin an term pawhtawisak a nih tur thu a lo sawi tawh a. October 19, 2024 khan Cabinet Minister K. Sapdanga pawhin Mualvum IR Police ho hmaah, party dang VC an la tam avangin hmasawnna hnathawh a harsa tih leh a rang thei anga inthlanna buatsaih tum a nih thu a sawi leh bawk tih sawiin, “VC leh LC ding laite hian sorkarin mipui tana thawk tura a tih an tih duh loh sawi tur pakhat mah an hriat loh laiin hmasawnna hna thawhpui atana a ding laite an thawhpui duh loh vang a ni. Ngaihdan inang lote inpawm tawn thiamna hi democracy chakna leh ropuina a nih laiin, ZPM sorkarin party bil sorkar din a tumna langsar tak hi an hlawhtlinpui lohna turin kan vote hlu tak hmangin i dodal ngam ang u,” tiin an party mipuite a sawm.
ZPM sorkarin mipui sorkar ni lo, party sorkar sawhngheh an tum ngawr ngawr avang hian inthlan hun pangngai pawh nghak thleng ngam lovin, tun tuma VC/LC inthlanna neih tur hi hnawhsarum taka puangah puhin MNF treasurer chuan, “VC/LC Election-ah education department hnuaia zirtirtute chu a buai ber tur an ni a. ZPM sorkarin mipuite inthlanna an kal luih pui hun hi HSLC exam lai leh HSSLC exam tan dawn tep a ni a, Inthlan nan zirna in tam tak hman a ni dawn bawk a. Zirtirtuten zirtir hna an thawhna tibuai zawng leh zirlaite tana boruak dang siam hun loh lai taka VC/LC inthlanna buatsaih luih a ni tur hi ZPM sorkarin zirlaite leh zirtirtute a ngaih thahzia tichiangtu a ni a. Sorkar thuneihna hman sualna pawi tak, zirlaite tawrhna thleng tur pawh pawisak lohna a nih avangin, VC/LC inthlanna neih turah hian mipuiten zirlaite thlavang hauhna lantir nan, MNF candidate-te hnehna min chantir a ngai a ni,” a ti.
Lalruatkima chuan ram hruaitu hmasaten mipui mamawhna hria a, theihtawp chhuaha rohlu an lo siam leh an enkawl Lengpui Airport pawh NGOCC-te meuh pawhin an dodalna karah India sipai, IAF hnena hralh an tum mek tih sawiin, “An chhuanlam sum senso a hautak tih hi sorkar kal ta zawng zawng khan an chin fel theih laiin kum khat chuang awrh an sorkar a, an enkawl thei lo hi a mak a ni. Lengpui Airport hi IAF hnena an hralh anih chuan strategic location-ah hman a ni mai dawn a, mipui tan a him lo a ni,” tiin, ZMC leh hydel project thlengin hralh an tum ta zel mai hi pa zawmthaw tak, chhungkaw bungraw hralh tur dap ching, chhungkuain awm tha duh lo/drug addict an kawl ang mai hian hralh tur an zawng ta zel mai tih a sawi.