Brazilian club Santos chuan Saudi Pro League club Al-Hilal-in Neymar-a contract an tihtawp hnuah lak luh tumin an dawr mek.
Kum 32 mi, Brazil tana goal thun tam ber ni mek hian hun reilo te chauh khel turin inkhelh bul a tannaa khel leh tur hian a inziah luh rin a ni.
Al-Hilal nen hian inbe rema contract titawp niin Neymar-a tan hmalam pan zelna tura thil tha zawk nia ngaih a ni.
Saudi Arabia-a hun a hman chhung hian hliamin a tibuai nasa hle a, August, 2023-a £ maktaduai 77.6-a a zawm hnuah vawi sarih chiah a inkhel.
Tun season-ah vawi hnih chiah a inlan a, a hnuhnung ber chu November-a bench atanga a luh kha a ni.
Al Hilal chuan, “Al-Hilal tana a thawhnaah Neymar chungah club chu a lawm a, a kal zelna turah duhsakna kan hlan,” an ti.
Major League Soccer (MLS) club Chicago Fire chuan Neymar-a hi United States-a lak luh an tum ve a; mahse, Santos-a kir leh a duh zawk.
Inter Miami pawhin an dawr nia sawi a ni a, Neymar-a hi Barcelona-a a khelhpui thin, Lionel Messi leh Luis Suarez te nen khelhho lehna remchang siamsak an tum.
Neymar-a hi Barca atanga Paris St-Germain-in kum 2017-a £ maktaduai 200-a an lei hnuah khawvela player man to ber a la ni zel.
Al-Hilal-ah hian Neymar-a hian thla sarih daih contract a la nei a, kum hnih chhung atana zawm niin kum khatah £ maktaduai 129 a hlawh nia sawi a ni.