January 28 – February 14, 2025 chhung hian India rama infiamna kutpui ber National Games vawi 38-na chu Uttarakhand-ah neih a ni dawn a. Mizoram aiawh turin sports discipline 11 te an qualify a, player fehchhuakte atanga chhutin Mizoram hi medal 27 la thei dinhmunah an ding.
Mizoram inlanna tur hi athletics, archery, boxing, cycling, football (men), hockey (women), judo, taekwondo, weightlifting, wrestling leh wushu te niin wild card-in aquatics an tling bawk a. Player khel thei 66 leh team official (coach/manager) 20 leh contingent official pali nen Mizoram team hi 90 an ni.
Mizoram aiawh turte zinga medal lak theihna tur athletics pahnih, archery pakhat, aquatics pahnih, boxing panga, cycling pahnih, football (men) pakhat, hockey (women) pakhat, judo pathum, taekwondo panga, weightlifting pathum, wrestling pakhat leh wushu pakhat, a vaiin medal 27 la thei turin player-te tirh chhuah an ni ang.
Medal la ngei tur a beisei an nih vek rualin taekwondo, football, hockey leh weightlifting te chu gold la thei tura beisei sang zingah an tel a ni.
National Games khel tur hian an sports discipline tina National Senior Championship hnuhnunga a sang pariatte an tling thin a. Central Service zingah army, airforce leh navy te aiawhin Services Sports Control Board (SSCB) chuah a tel thei bawk.
Mizoram team hi theihtawp chhuahin inbuatsaihna an kalpui hlawm a. Mizoram Olympic Association pawhin tha taka an khelh theih nan training chhung leh zin kawng atan sum dinhmun phak tawk a thain a thuam bawk a. An inkhelh hun tur erawh an in loh avangin Uttarakhand thleng tawh an awm a. Chanchin ziah laia Mizoram chhuansan mekte leh a tawp lama kal turte an awm bawk.
Mizoram contingent enkawl tur hian Chef-de-Mission V. Lalzawmliana niin Joseph Thansanga chu Dy.Chef-de-Mission a ni a, Lallianthama leh Lalduhkima Sailo, contingent assistant te chu Uttarakhanah thleng tawh a. Games chhung zawngin khaw hrang hranga khel Mizoram team hi an vil ang.
National Games opening ceremony hmang tur hian MOA President Robert Romawia, MLA bakah SYS Department Secretary Lalramsanga, IRS leh SYS Director H.Lalhmingliana MCS te an kal bawk.