National TB Elimination Programme, National Health Mission buatsaihin NSS Unit Helen Lowry Higher Secondary School te nen nimin zing khan TB Awareness Rally neih a ni.
State TB officer Dr. Febiola Kharkongor chuan rally khuhhawnna neiin, rall buatsaih chhan a sawi a. Hemi zawh hian pledge chhiar tualna an neih zawhah Vaivakawn Traffic Point-ah tanin National Health Mission office, Dinthar thleng rally neih a ni.
He hun hmanpuitu, Dr. Eric Zomawia, Mission Director, NHM chuan rally an nei thei chu lawmawm a tih thu a sawi a. Kum 2025-ah TB hi India ram atanga umbo tum a nih tawh avangin hemi hmalakna pawimawh tak, ni 100 chhung TB zawn chhuah beihpui thlak chu kalpui mek a nih thu a sawi a. Mizoramah chuan Aizawl, Champhai, Serchhip leh Mamit district-ah te kalpui mek a nih thu leh mipuiten TB an vei nge vei lo hmuhchhuahsaka enkawl vat chu he hmalaknain a tum ber a nih thu a sawi.
Dr. Eric Zomawia chuan TB hrik chu mi tam takin an pai sa angah ngaih a nih thu leh tunah natna a rawn thlen mai lo a nih pawhin engtik hunah pawh TB natnaah a insiam thei tih a sawi a. TB lanchhuah dante hriatchiana a rang thei ang bera in-test vat thin chu a pawimawh thu a sawi a. Zirlai naupangte chu zuk leh hmuam laka fihlim a, chaw tha leh hrisel ei uar turin a fuih bawk.
He hunah hian NHM hnuaia thawktu eng emaw zatin an hmanpui bawk.