Aizawl: MPCC Treasurer Dr. Lalmalsawma Nghaka chuan, “VC/LC inthlan hi Congress tan thawh kân lehna thlentu a ni dawn tih kan hria,” a ti.
Congress treasurer hian Mamit district chhunga khaw hrang hrang – Mamit, Bawngva, Suarhliap, Kanan Thar, Damdiai, Vawngawnzo tlawhin a zin a. “Tuna kan sorkar hrawn mekah hian mipui an rum nasain thil man a sang a, sorkarin chhiah a tihpun avang leh buhfai man a tihsan vak avangte hian mi rethei tan khawsak a harsa em em a ni,” a ti.
“Hetih lai hian kan party hotu rual, MLA leh minister-ten nuam an tawl mek niin a lang a. Mizorama la thleng ngai lote pawh a thleng chho ta zel, minister-ten sorkar sumin an mahni in chei nan sum vaibelchhe tel an hmang a, sofa set nuai 5 chuang man an lei tih thawm te kan hre ve leh zel,” a ti.
“Kan MLA leh party hotute hi motor tha leh changkang hmangin an intlansiak emaw tih tur khawpin motor man to an lei zung zung a. Kan ram mipuite an retheih sawt sawt laia hetia nuam an lo tawl hi a pawi hle a ni,” a ti.
“MNF sorkarah khan mipui an beidawng hle a, a bik takin kut hnathawktute leh thalai rual beidawng hle a. Vawiina kan sorkar hrawn lai mek pawh hian mipui nawlpui tan beidawnna an thlen mek,” a ti a. Congress party chuan mi harsa mi rethei leh mi nawlpuite dinhmun tha zawk leh nghelnghet zawka an inhlan kai theih nan policy tha leh beiseina thar nen nasa takin hma an la mek tih a sawi.
Congress treasurer chuan mipui nawlpui, mi retheite tan a din ngaiin a la ding reng tih a sawi a, “Mi harsa zawkte tan NLUP aia changtlung zawk leh tha zawk scheme kan chhawp chhuak leh dawn,” a ti a. An party hruaitute chuan nuam tawl ve lovin ram mipuite harsatna hrethiama khaichhuak leh turin thapui an awn thawh leh dawn tih a sawi.
Inthlan lo awm tur chu Congress party thawh kan lehna thlentu a ni dawn tih an hria tih a sawi a, “Chuvangin, Mizoram mipuiten Congress-ah rinna nghat thar leh turin ka sawm che u a, mipui nawlpui huap sorkar a din theih nan tan i la thar ang u,” tiin a sawi.