Aizawl: ZPM President Lalliansawta chuan hmingchhiatnaa an hlauh ber pakhat, corruption-ah an party minister-te chu an filhlim hle nia an hriat thu a sawi.
ZPM Party Office, Venglai, Lungleiah nimin khan Lalliansawta hian an party zawm thar a lawm lut a. Thu a sawinaah an minister-ten theihtawp an chhuah a, hun vawn dik kawngah a hmahruaitu an ni thei zel tih sawiin, “Hmingchhiatnaa kan hlauh ber pakhat, corruption-ah an filhlim hle niin kan hria a, kan lawm hle bawk,” a ti.
“An hnathawh hi ala langsar tulh tulh dawn a ni,” a ti bawk.
“District council hun ata tawh, a ni lo lamah sum kan hmuh angte a liam duak duak thin avangin tun hun hi kan thleng a ni a. Chuvangin, tun hunah chuan kalphung thar, a neitu mipuite ta, mipui sorkar, roreltuten an duh ang anga sum an chawm bawrh bawrh ang ni lo, mipui thleng phak sorkar kan din chho ve ta,” a ti.
“Mizo chuan ‘thih leh ruam khatah, dam leh tlang khatah’ tiin, ‘sem sem dam dam’ tiin kan lo awm ho thin a, chutiang rilru pu tur chuan kan rilru kan siam dik hi a tul a ni,” a ti.
Hnathawhna tur a nih dan tur anga kal pui a nih chuan, a thawktu ni kher lote pawh tuiah te, engah te an lo hnianghnar vek thei dawn tih Lalliansawta chuan a sawi a. “Kan thawh awm tawkte pawh kan la thawk zel ang, mahni zawn theuhah mi dangte sawiselna chhanna tha ber chu kan hna thawhah a ni ang; chuvangin, hna tha kan thawh a tulin ka beisei hle a ni,” a ti.
ZPM Southern Headquarters, Lunglei thuchhuahin a tar lan dan chuan nimina ZPM Southern Hqrs President Lalhmingliana kaihhruai inkhawmah hian an president hian an party zawm thar mi 771 – South Tuipui atangin 126, Lunglei North atangin 44, Lunglei East atangin 219, Lunglei West atangin 74, Lunglei South atangin 72 leh West Tuipui atangin 236 a lawm lut a ni.
Inkhawmah hian Health Minister Lalrinpuii pawhin thu a sawi a. General Headquarters hruaitu eng emaw zat leh Lunglei District MLA-te an tel a, party mi leh sa leh lawm luh thar mi eng emaw zat an tel bawk.