Congress thupuangtu, Dr. Lallianchhunga’n rulling VC leh eptu VC-ten chanvo inang an chang tawh a, Mizoramin ruling worker-te hnathawh vil thei tur eptu VC a mamawh zawk tih a sawi.
Nimina Aizawl Press Club-a MPCC hruaituten thuthar thehdarhtute an kawmnaah Congress Spokesperson Dr. Lallianchhunga chuan sorkar laipui Finance Commission-in tual chhung sorkarte chanvo a bithliah fel vek tawh avangin eptu VC leh LC-te tan hmasawnna hna tam tak a thawh theih tawh a, ruling VC nih vanga fachuam hamthatna dawng bik tura inngaih tur a ni tawh lo tih sawiin, VC ni turin ruling kher nih a ngai tawh lo a, ruling VC leh eptu VC-ten chanvo inang an chang tawh thu te, he thu hi ZPM hotute ngei pawhin eptu an nih laia tui taka an lo sawi tawh thin tho a nih thu a sawi.
Congress thupuangtu, Dr Maliana chuan, “ZPM sorkar hnuaia Mizoram hmasawnna atana kan mamawh chu eptu VC a ni,” a ti a. ZPM ruling worker-ten khaw chhunga leh veng chhunga hna an thawhte hneh taka lo vil thei tur eptu VC tha an awm a tul thu te, chutianga hmalak chu Congress party chuan Zoram mipuite an tiam tih a sawi a, khaw tinah hmasawnna tha leh tlo a awm theihna turin Congress party VC candidate zawng zawng thahnemngai taka vote tura mipui an ngen thu a sawi.
AMC Corporator Rosiamngheta chuan local council chu khawtlang roreltu tur an ni a, sawrkar laiin an party thlang tlinga hmasawnna lo kal tur anga an inzuar chu mipui hmangaihna aia party hmangaihna a nih zawk thu a sawi a. “Kan zalenna khawih chingpen an duh vang a ni,” a ti a, khawtlang thuruk enkawltute chu uluk taka thlan a ngaih thu a sawi.