Amir of Qatar Sheikh Tamim Bin Hamad Al-Thani chuan Thawhtanni leh Thawhlehni hian India a tlawh dawn a, Prime Minister Narendra Modi nen pawh inkawmin ram pahnih inkungkaihna hrang hrang an sawi dun dawn tih Indian external affairs ministry chuan Inrinni khan a puang.
Amir-in a tlawh tur hian ‘kan inkungkaihna thang mek zel a tinghet lehzual dawn’ tih thuchhuahah tar lan a ni bawk.
Amir hi an ram mi pawimawh tak tak – minister, sorkar hotu lian leh sumdawng aiawhte an zui dawn tih external affairs ministry-in thuchhuah a siamah hian a tar lang bawk.
“Prime Minister Pu Narendra Modi-a’n a sawm angin Amir of the State of Qatar, His Highness Sheikh Tamim Bin Hamad Al-Thani chuan India chu February 17-18, 2025 hian a lo tlawh dawn a ni,” an ti.
Tun tum hi Amir of Qatar-in India a tlawh vawi hnihna tur a ni a. March, 2015 khan a lo tlawh tawh bawk a ni.
“His Highness the Amir of the State of Qatar hi February 19-ah Rashtrapati Bhawan tualah amah lo dawnsawnna puala hun hman a ni ang a. HH Amir hian a châm chhungin Hon’ble President Droupadi Murmu chu a kawm dawn a, ani hian a lo lawmna hun a hmanpui bawk ang a. HH Amir hi Prime Minister Pu Narendra Modi pawh kawmin ram pahnih inkara inkungkaihna thil hrang hrang an sawi dun ang,” an ti.
India leh Qatar hi hun rei tak atang tawha inkawmngeih, inring leh inzahtawn tak a ni a. Tun hnai kum eng emaw ti atangin ram pahnih inkungkaihna hi sumdawnna, investment, energy, technology, nunphung leh mi chengte inpawhna kawngah thuk zawkin a kal zel a ni tih ministry chuan a sawi bawk.
Qatar-ah hian ram dang mi awm zingah Indian chu a tam ber niin ‘Qatar-in hma a sawnna kawngah a tha zawngin tha tam tak an thawh ve a ni’ tih an tar lang bawk.