Delhi chief minister thar tur chu Ramlila Maidan-ah Ningani tlai hian lak luh a ni dawn a, BJP hruaitu leh minister bakah an thawhpuite an tel vek dawn.
Tlai dar 04:30-a inkhawm tan turah hian an party chuan kum 26 chuang hnua khawpui bera sorkarna an chelh leh tan hun hi pui tak leh hriat reng tura tih an tum.
Sorkar thar lak luh inkhawm tan tak tak hmain rimawi pawh a ri nasa dawn a, Kailash Kher pawh a zai dawn.
State 20-a chief minister leh deputy chief minister theuhte pawh an tel dawn a. Ram thenkhat palaite pawh sawm an ni a. State danga BJP hruaitu leh worker, Delhi-a an sorkar theih nana campaign-tute pawh an tel rin a ni.
Lemchang thiam leh industrialist pawh 50 vel sawm an ni a. Delhi-a lo neitu te, sorkar laipui scheme chhawrtu hmeichhia leh vantlang mite pawh sawm an ni bawk.
Sakhaw hruaitute aiawhin Baba Ramdev, Swami Chidananda, Baba Bageshwar Dhirendra Shastri leh sakhaw danga hriat hlawhte an tel bawk ang.
Sorkar thar lak luh inkhawm tur hi lian taka tih tum a nih mek laiin tu nge chief minister ni dawn tih erawh Thawhtanni zan thleng khan a la hriat loh. Prime Minister Narendra Modi-a’n France leh US a tlawhin thutlukna a tikhawtlai nia sawi a ni a; mahse, a haw hnuah ni hnih a liam tawh a, tu hming mah la puan a ni chuang lo.
Chief minister hlui, Saheb Singh Verma-a fapa, Parvesh Verma chu a hming a ri ring hle a, hetih lai hian hming lang dang 15 vel an awm a, heng zingah hian cabinet leh assembly speaker turte pawh an tel.
Mi pakua thlan chhuah an ni a, Delhi hian minister pakua leh chief minister a nei dawn nia sawi a ni.
BJP hian MLA 48 neiin Nilaini hian an inhmu khawm ang a, an hruaitu tur an thlang a, Aam Aadmi Party (AAP) hruaitu, Atishi-i a thlak zui ang.
Thla tira inthlanah khan BJP hi chiang taka thlan tlin niin bial 70-ah bial 48 an la a, AAP-in 22 changin a hmaa 62 nei atangin an tlahniam hle.
Kum 10 chhung AAP-in ro an relna chu a tawp dawn ta a, hetih chhung hian an hruaituten ei rua puhna lian tak an tawng a, heng zingah hian a hun laia chief minister, Arvind Kejriwal-a ngei pawh a tel a. An hruaitu tam tak, Kejriwal-a leh a deputy thin, Manish Sisodia te ngei pawhin lung in an tang.