Aizawl: Ministry of Rural Development hnuaia Department of Land Resources-in Central Sector Scheme kal mek DILRMP hnuaia programme thar, National Geospatial Knowledge-based land Survey of Urban Habitations (NAKSHA) chu nmin khan Revenue Minister B Lalchhanzova’n a hawng.
He Programme hnuaiah hian India khawpui 153-te chu Pilot project atan thlan niin, chung zingah chuan Aizawl South (AMC ward XI – XIX) huam chhung chu Mizoram atanga thlan a ni.
Irrigation & Water Resources Department Auditorium, MINECO-ah hawnna inkhawmah Minister B Lalchhanzova chuan, NAKSHA chuan khawpui land record tihchantlun chu a tum ber a nih thu sawiin, Aizawl South area chu Oblique Angle Camera leh LiDAR sensor te hmangin drone emaw, helicopter-a thla lak anih hnuah, 3D map teh theih siam chhuah a ni dawn a, chu chu leilungah finfiahna neih leh vek a nih hnuah final map siam a nih tur thu a sawi.
B Lalchhanzova chuan, map chu 3D anih dawn avangin ram pass zawng zawng chhinchhiah anih bakah, ram chhunga awm in leh building-te pawh teh theihin a awm vek dawn a, hei hian Revenue dept bakah UD&PA te, AMC te, Disaster Management lam atan bakah khawpui planning atan hmanraw pawimawh tak anih tur thu a sawi bawk.
He hun hi Vanlalmawia, MCS, Secretary LR&S in kaihruaiin, R Lalthazuala, MCS, Director LR& S in a scheme a sawifiah bawk.