Uefa Champions League kalphung tharah a thiam 16 a hriat ta a. Nilaini zanah play-off phase khelh zawh niin Europe-a club inelna sang bera intum leh turte chu Zirtawpni tlai hian pawh a ni dawn.
Intum tur pawh leh dawnah hian seeded team an awm sa a, league phase khelh zawh taka che tha, knockout stage kai nghalte kha pakhatna atanga pariatna an ni dawn a. A bak play-off khela tlingten an dawt ang.
Champions League intum turte hi Zirtawpni chhun dar 11:00 (India-a tlai dar 4:30)-ah pawh a ni dawn a, Europa League leh Conference League-a intum turte pawh zui an ni ang.
Tar lan tawh thin angin tun season atangin Champions League khelh dan tihdanglam niin a team 32 ni thin kha 36-ah tihpun a ni a, inkhel pawh vawi 125 awm thin kha 189 a ni tawh dawn a. Final hi Munich-ah May 31-ah khelh a ni ang.
Kalphung thar a nih angin thil a danglam zel a, intum tur pawh thui tak hriat lawk theih anga sawi theih pawh a ni.
Seeded team pariatte chu pahnih zel inkawpin awmtir an ni a, Liverpool (1) leh Barcelona (2) chu lehlam lehlamah awmin final hma chu an inhmachhawn thei dawn lo.
Hetih lai hian season liam tawh lama knockout stage hmasa bera thil theih loh thin kha theih tawhin ram khat team pawh an intum nghal thei tawh dawn.
2021-22 atanga hman tan angin away goals rule hman a ni tawh dawn lo bawk.
League phase-a a chung bera awm, Liverpool chuan vawi hnih khelha 10-0 zeta Brest sawptu, Paris St-Germain emaw, Benfica emaw an tum dawn.
Arsenal chuan AC Milan hnawt chhuaktu, Feyenoord emaw, hun pek belha Juventus paltlangtu, PSV emaw an hmachhawn a ngai dawn.
Aston Villa chuan Atalanta hnehtu, Club Brugge emaw, Sporting laka 3-0 a chak, Borussia Dortmund emaw an tum thei bawk.
Champions League Round of 16 draw
PSG vs (1) Liverpool or (2) Barcelona
Club Brugge vs (7) Lille or (8) Aston Villa
Real Madrid vs (5) Atletico or (6) Leverkusen
PSV vs (3) Arsenal or (4) Inter Milan
Feyenoord vs (3) Arsenal or (4) Inter Milan
Bayern Munich vs (5) Atletico or (6) Leverkusen
Dortmund vs (7) Lille or (8) Aston Villa
Benfica vs (1) Liverpool or (2) Barcelona