Aizawl: Sports Minister Lalnghinglova Hmar hovin Nilaini chawhnu khan Aijal Club-ah 38th National Games zawh taka Mizoram dinhmun thlirletna leh, hmalak zel dan tur an sawi ho.
Sports department Secretary Lalramsanga Sailo kaihhruai inkhawmah Sports Minister Lalnghinglova Hmar chuan 38th National Games-a medal late leh Mizoram aiawha kal zawng zawngte a lawmpui thu a sawi a. Mizote hi sports ngaina tak an nih rualin state dang nena intihsiak nikhuaah an result a tha tawk lo thin avangin, infiammite hmasawn dan tur ngaihtuaha sawiho a ngaih thu a sawi a. “Kan thiamna leh theihna chu medal hmang zela tehin kan awm dawn a, National Games hmangin kan hmaah darthlalang a inhung. Kan kal dan ngai renga kan kal chuan kan result pawh a ngai reng dawn. Kan dinhmun a hniam tih inpawm chungin siam that ngai lai siam tha ngam ang u,” tiin kalkhawmte a sawm.
Sports minister chuan sports association hruaitute chu infiammite theihna tak tak phochhuak tura a fawng vuantu pakhat an nih thu sawiin, “Khawi laiah nge tih dik loh kan neih? State dang leh association dang atangin zir theih kan nei em? Kan tih ngai loh tih ngai a awm em?” tihte inzawt fo thin turin a chah.
India rama sports inkhawmpui ropui ber, 38th National Games hi January 28 – February 14 chhungin Uttarakhand-ah neih a ni a. Services Sports Control Board (SSCB) chuan medal 121 lain pakhatna a ni.
Mizoramin taekwondo-ah gold medal pahnih leh wushu-ah bronze medal pakhat lain 28-na a ni a, hmarchhak state zingah Manipur (11-na), Arunachal Pradesh (23-na) leh Assam (24-na) te a pha lo a ni.