Mizoram tlawhin tun hnaiah central minister hrang hrang an rawn kal thin a, state hmasawnna leh hnathawh dan tlangpuite pawh an rawn en thin niin a lang. Tin, BJP lam sorkar lai a lo ni bawk nen, Mizoram BJP lamin an lo mikhualin, thuthar thehdarhtute an kawm fo ta a, sorkar duhkhawp lohna leh hmalakna that tawk lohna an rawn hre thei hle.
Ram hmasawnna hi a nih dan tur ang takin kan hmang lo ni hian a lang thin a, tunhnaia central lam hotute lokal pawhin an sawi nasat a ni zel mai hi kan inenfiah chu a ngai tawh deuh a ni.
Kar liamta maia lokal union minister of state for Micro, Small and Medium Enterprises (MSME) Shobha Karandlaje chuan sorkar laipuiin Mizoram tan sum tam tak a pe chhuak a, heng sum a pek chhuahte hi a hman that tawk loh avangin mipuiin harsatna an tawk tih a sawi veleh bawk a, ngaihtuah chian chuan sorkarna fawng chelhtute tan chuan zahna tham chu a ni thin.
PM scheme hrang hrang awmte pawh a hun takah pek chhuah zel a nih thu union minister hian sawiin, state sorkar in a hman that tawk loh thu a sawi siah siah mai a, mipuiten harsatna kan tawh phah hial thin thu a sawite hi ngaihtuah chian a, ke chheh kan tihdik chhoh hi chu a hun tawh hle a ni.
Eng party pawh lo sorkar se, sawisel tawk lo erawh an awm thei hauh lo ang. Chutihrual erawh chuan kan hmasawnna tura sum lokalte hi a dik taka kan hman thiam leh mipuite hmasawnna tura kan pekchhuah dik hun a nghahhlelhawm hle.