Formula One team Ferrari driver Charles Leclerc chuan world champion nih ngei a tum thu sawiin, a naupan lai atanga a thil tum hi a hlen chhuah hma chu theihtawp a chhuah zel tur thu a sawi.
Season tin hian Leclerc chuan champion tumin theihtawp a chhuah thin a, a hnaih tial tial niin a ngaih theih bawk a. Kum 2022-ah leh season liam taah khan 2-na a ni a, kum 2007 hnua a vawi khatna atan Italian team chu pakhatna nihpui leh ngei hi a tum hle.
Leclerc chuan, “Ka tum ber chu world champion nih a ni a. Nikumah khan constructors’ championship-ah 2-na kan ni a, 1-na nih theih hi ka duh a. Drivers’ championship-ah a chungnung ber nih theih ngei hi ka duh a, hei hi ka thil tum awm chhun niin, ka puitlin theih hma chuan theih tawp ka chhuah zel ang,” a ti.
March 16 atang khian Formula One season thar an tan leh tawh dawn a, bul tanna tur chu Melbourne khawpuiah a ni a. Red Bull driver Max Verstappen chuan ro a rel tluang hle a, a vawi ngana atan champion nih leh ngei a tum hle dawn a. McLaren driver Lando Norris pawh Verstappen hnaih thei ber tura rin kai a ni mek a, Lando teammate, Australian driver Oscar Piastri pawh ngaihnep chi a ni lo ang.
Kum 2024-ah 3-na ni mah se Leclerc chu intlansiak vawi thumah 1-na a ni ve thei a, hei hi Formula One a luhchilh hnua a chet that ber tum a la ni.