Aizawl: Nimin khan MJA Kolasib District chuan NHIDCL hnuaia National Highway 306 kawngpui siam that mek tlawhin an en fiah.
National Highway 306 hi Ministry of Road Transports & Highways hnuaia awm niin, Mizoram PWD leh NHIDCL ten an enkawl a, NHIDCL te hian Bilkhawthlir atanga Vairengte inkar enkawlin, anni hian kawngpui thawmt tha turin Balaji Construction an ruai a ni.
Balaji te hian February 1, 2025 khan Vairengte attanga black topping hna thawk tanin, tun dinhmunah North Chhimluang an pel tawh a, an kawng siam tur chin hi km 28 niin, km 18 an zo tawh a, km 10 hmabak an la nei a. Balaji Construction-a project director Rajesh Chaudhary chuan an hnathawh hmabak awm te chu March 2025-ah zawh fel vek an tum niin a lo hrilh.
MJA Kolasib district-in an hnathawhna hmanrua leh bungrua te pawh an enfiah nghal a, an lung hman te chu a tha tawk nia an hriat thu an sawi.
Hetih rual hian, Mizoram PWD in an enkawl Kolasib Leitan leh Bilkhawthlir futsal ground inkar kawngpui hi tun dinhmunah thawm that mumal ni lo vin, a siamna tur sum pawh a awm lo va, kawng hi a chhiat nasat avangin PWD (Highway Division) te chuan kawng neitu MoRTH hnuaia Regional Office, Guwahati-ah short term maintenance fund, Rs. vbc 4.74 an dil mek a. Amaherawhchu, Regional Office lam attangin chhanna dawn a la ni lo va, fund a awm loh avangin kawngchhe lai thawm that pawh an ti thei rih lo nia sawi a ni.
MJA Kolasib district president Andrew Vanlalauva chuan, national highway 306 hi Mizoram mipui mamawh zawng zawng deuhthaw lak luhna kawngpui a ni a. Kawngpui pakhat, enkawltu hrang awm chuan harsatna a thlen nia a hriat thu a sawi a. Nimina an tlawh lai pawh hian hmun eng emaw zatah lirthei tlan harsa khawpin kawng chhia a la awm niin a sawi.