Aizawl: ZPM party chuan kuthnathawktute chu sorkar flagship programme hlawhtling leh hlawhchham kawngah mawh an phur lian hle a ni tih inhria a, inenfiah thuai turin an chah.
Nimina thuchhuah an siamah ZPM party chuan, kalphung thar mipui sorkarah kuthnathawktute bana kaih policy a taka a kalpui mek maia, tun hnaia sorkarin sawhthing a lei, khaw pahnih atanga thawn chhuahte chu a chhe hle tih hmuhchhuah a ni a. Mizoram sorkarin a thawhpui, a leitu Reliance Company-in thawn chhunzawm tawh rih lo turin thutlukna an siam hia chu hnam anga mualphonaah an ngai a, pawi an tiin kuthnathawktute chu inenfiah thuai turin an chah.
ZPM chuan Mizoram Agricultural Marketing Board hotuten sawhthing lei leh hralh chung changah ‘Mizote chu hnam dangin sumdawnpui tlaka min ngaih theih nan an rinawm tur a ni a, an sawhthing hralh turte pawh a fai tha tur a ni’ tia vawi tam tak mipui zirtirna thu an lo au chhuahpui tawh hnua, khaw thenkhata kuthnathawktuten zawm duh lo a, sawhthing fai tha lo leh hralh chhuah tlak loh an thawn chhuak lui hian sorkar hmalak leh zelna turah pawh harsatna a thlen mek thu leh, kuthnathawktu rinawm tak takte tan pawh harsana lian tak an thlen mek tih an sawi.
Sorkar Flagship Programme hlawhtlin leh hlawhchham kawngah kuthnthawktuten mawh an phur lian hle a ni tih inhria a, tun hnuah hetiang a thlen nawn tawh loh nan kuthnthawktute chu rilru dik tak pu tura ngenin, bana kaih tlak lohte thlai thar sorkarin a lei chhunzawmsak theih loh khua an lo awm a nih pawhin hma an lak pui thei dawn lo tih ZPM party chuan an tar lang bawk.