Kum 2012 atanga nikum December thla thleng khan Mizoramah khualzin (tourist) 7,51,514 an rawn lut a. Heng khuazinte hi India ram pawn leh ram chhunga mite an ni.
Tourism department chhinchhiah danin Mizoramah khualzin kum 2012-2021 December thlen khan India ram pawn (foreign) mi 8,705 an awm tawhin India ram chhung (domestic tourist) atangin khualzin 7,42,809 an rawn lut tawh a ni.
Khawvel ram hrang hranga Covid-19 hripui len vanglai, sorkar kum anga kum 2020-2021 chhung khan Mizoramah khualzin 20,564 an awmin, heng zinga 90-te hi foreign atanga lo lutte an niin, mi 20,474-te hi domestic tourist an ni thung.
Kum kal ta, 2021 December chhung khan khualzin 75,632 an awm a, heng zingah mi 206-te chu India ram pawn atanga Mizorama lo lutte an ni a, mi 76,426-te hi India ram chhung atanga khualzin te an ni.
Tourism department hotute sawi danin khualpang zina Mizorama lo zinte leh hna pawimawh thila rawn zin, darkar 24 chhung awm tlingte chu tourist anga chhiar an nih rualin, eizawnna avanga rawn kal nazawng erawh chhiar tel an nih loh thu an sawi.
The Zozam Times zawhna chhangin Tourism Minister Robert Romawia Royte chuan, Mizoram Tourism department hi tobul neiin a ding ve tawh tih sawiin, “Thil ti tak tak tur chuan a nghahchhan lungphum a pawimawh a. Chutiang tur chuan tunlai milin Mizoram Responsibility Policy, 2020 kan siam fel tawh a. Tourist Trade Act ka pass tawh bawk a. Chumi hnuaiah rules ngai zawng zawng kan siam tawh a ni,” a ti.
Robert Romawia Royte hian a theih ang anga Mizoram budget pawn lam atanga sum zawn hi tourism hnathawh lian pakhat a nih thu a sawi a. “Mizoramah budget engtham mah kan nei ve lo a, Rs. vaibelchhe 10 awrh chauh kan nei. Chuvang chuan hmun dang atanga sum zawn a ngai a, theih ang angin tan kan la a. DPR-te pawh kan siam nasa a, sanction tawhte, la sanction mai turte pawh a awm,” tiin, tunah hian Rs. nuai 10,000 dawn, state budget let 10 lai mai approval an neih tawh thu leh la hmuh zel an beisei thu a sawi.
An rawtna angin Allocation of Business Rules siam danglam a nih thu sawiin tourism minister hian, “Hotel te, restaurant te, aerosport te hi Toursim dept mawhphurhnaah dah thar a ni a. Chuvangin, hotel tawp lutuk tih ang chi te, ei bang han chhun let leh tih zawng zawngte, hnam dang leh tenchhe deuh pawhin an ei theihna tur zawng zawng siam kan tum a. Covid-19 leng vangin kan duh angin kan la bawhzui hman lo a ni,” a ti.
Tourism department hian Covid-19 leng an tawrh nasat thu sawiin, “Tourist Lodge 31 lai Covid-19 kai dam lo dah nan an hmang a. Heng lodge-te hi hmang zui leh turin nasa taka thuam that a tul dawn a. Sanitizer kan hman nasat hian kawngka kalhna thlengin a tituiek duh em em a. Kan lodge-te hi Covid-19 hian a seh chhe nasa khawp mai,” Robert Romawia Royte hian a ti bawk.